Aizawl : BJP Mizoram President Vanlalhmuaka chuan Mizoram chu mitinin intodelhna atana mamawh hmasawnna ruhrel tlakchham pawh hre lo hial khawpa tlachham hi siamtha turin hma an la dawn niin a sawi.
Nimina an party pisa-ah thu thar thehdarh tute kawmin Vanlalhmuaka hian, kumin kum tawpa MLA election neih turah Mizoram mipui te nitin mamawh hmasawnna a taka thlen thei tur sorkar tha leh rintlak nei turin theihtawp an chhuah dawn niin a sawi a. BJP in Mizoramah thuneihna changa an sorkar chuan zirna, hriselna leh hmasawnna ruhrel din chu ram chhung hmun dangte el pha tura buatsaih hi an ngaih pawimawh ber tur a nih thu a sawi.
Vanlalhmuaka hian BJP an sorkar hunah Mizoram hmasawnna daltu leh mipuite chanai ei zotu, corruption ti thinte dimdawina tel miah loin, dan angin BJP sorkarna state dangte angin central agency hmangin an hnung khirh dawn a. Tunah hian sorkar laipuiin chief minister remtihna ngai kher loin state-a CBI ko lut thei turin ruahmanna a siam nia sawiin, “Hmasawnna daltu corruption ber kan hnungkhirh chuan hmasawnna chu tute emaw hmuiah chauh thleng lo in, a chang tur dik tak te’n an chang tawh ang,” a ti.
BJP Mizoram President hian, Mizoram chief minister in Covid-19 hri leng chhuan lama hmanga, vawiin ni thlenga state sum harsat thu a sawi fo chu thu belhchian dawl lo leh ram sum enkawl kawnga a hlawhchham zia a phat marna mai a nih thu a sawi a. India ram sorkar leh India ram economy hi Covid hripui avangin sum lamah a harsat phahin, hmasawnna kawngah a thuanawp phah lo nia sawiin, “Covid hripui leng avangin India sorkar leh sState hrang hrangte chuan Financial leh development Management-ah nasa takin tan an la a. Covid -19 hripui chu sum siam nan hmang lo in, hmasawnna ruhrel siam nan an hmang a. State tinin Covid-19 kha hmasawn nan an hmang a ni,” a ti bawk.