Aizawl : Thawhtannia MNYF President Dr L Thangmawia, MLA in Mizo Hnam Run-a a thusawi chu MPYCC chuan chhang letin, MNF hi Pathianin Mizote tana pek a nih thu a sawi chu Mizoram mipui zah lohna leh pawisak lohna lian takah an ngai tih an sawi.
Nimina an thuchhuahah Congress Thalai hian, Dr L Thawngmawia’n party thenkhat chu a dintute la dam lai ngei pawhin hmuh leh hriat tur awm loin an boral a. MNF erawh chu ralthuam leh sipai chakna hmanga nekral an tum pawhin Pathianin a chawisang zel tih a sawi hian Mizoram mipui rilru a tihnat thu an sawi.
MNF an lan apiangin Mizoramah buaina leh manganna nasa tak a thleng ziahah puhin MPYCC hian, “Mizoram mipuite dinhmun a derthawng a, mipui an rum thin. MNF sorkar hi Mizoram National Front inti chunga hnam dang uchuak taka duhsak thintu, Mizoram mipuite chanai laksaktu a ni,” tiin, an intiamna SEDP hmanga mipui bumtu an ni tih hi an ngaihdan nghet tak a nih thu an sawi.
MPYCC hian, tun hnaia Zalenna sual lai huna MNF Vice President, Lalnunmawia Diary bu thum ‘Zalenna Chauh – East Pakistan-ah,’ ‘1971’ leh ‘Lalnunmawia Diary’ tih tlangzarh chuan Mizoram mipui ngaihven a hlawh a, a bung thu inziak te hian MNF party chet dan a hai lang a, a chhiartu mipuite rilru a tina thar hle niin an sawi bawk.
Congress Party hi Mizoram mipuite tana ding a ni a, mipuite tana a tiamte pawh party thliar loin New Land Use Policy(NLUP) hmanga tanpui an ni tih sawiin, “Mi tam takin eizawnna an neih phah a, AMC inthlan hnuhnung bera MNF Councillor (Corporator) a an dintir thenkhat te pawh NLUP dawnga eizawnna din thei an ni a, opposition bialah pawh NLUP tanpuina hmanga eizawnna nei ta MNF mi leh sa thahnem tak khawtin, vengtin leh mualtin a taka hmuh tur an awm a. MNYF President hian hei hi a duh chuan englai pawhin a en theih turin kan kawl reng a ni,” an ti.