Tottenham Hotspur striker Harry Kane chuan tunhnaia an chetchhiat kalsan lailawk turin a team a chakpui a. Inkhel a goal awmchhun khungin 1-0 in Fulham an hneh.
England captain hian Thawhtan zana Premier League inkhelah hian Tottenham record dinglai a tluk a. Club tana goal khung hnem ber Jimmy Greaves goal khung zat chu tlukin goal 266 a khung na chiah a ni.
Spurs hi tunhnaia Premier League match ruk an khelh atanga vawi hnih an chakna chauh a ni a. A zawna Arsenal leh Manchester City laka an tlawm hnuah hnehna an chang ve leh a. An chak avang hian point thum chauhin palina an pha lo mek. October thla hnua a vawi hnihna atan league inkhelah goal an venghim tluan leh bawk.
Kane-a zan
Tottenham chhuanvawr hian club record hi hun engemaw chen atangin club record siam tura rin hlawh tawh a ni a. Premier League bikah Spurs tan vawi 300 a inkhelh zanah chiah goal 199 a khung.
He goal khung tur hian tlarhma a a dinpui Son Heung-min ball pass la in a tih fo thin angin thiam takin a inher a, insiamrem nghalin goal a khung.
Spurs inkhel erawhin nidang a ang thova. Inkhelah bul an tan nung lo leh a, a tir darkar chanve chhungin football tha an khel thei lo.
Second half-ah erawh insiamtha in Kane-a’n goal khung theihna remchang vawi hnih a nei.
Inkhel zawhah captain Kane chuan, “Tuna kan dinhmun hi kan awm duhna hnuaiah a la ni a, mahse zanin hi kan tan zan pawimawh a ni.”
“Inkhelh hma in kan chak ngei a pawimawhzia kan sawiho a, goal venhim a, kan goal veng tura din ngheh kan thiam a, hengte hi kan lantir a pawimawhzia kan sawi nawn. Kan tan chak hi a pawimawh a, kan result hnuhnung pahnih hnuah hnehna chan hi a pawimawh hle.” a ti.