Australian Open mipa singles inelna a seeded number 3 nihna changtu Stefanos Tsitsipas chuan semi-final lut turin harsatna a nei lova. Jiri Lehecka lakah straight set a chakin final luh inchuhin Karen Khachanov nen an inkhel dawn.
Greek star Tsitsipas hian kum nga chhungin a tum li nan Melbourne a inelnaah hian semi-final a lut a. Tun tumah pawh hian a chetthat chhunzawmin 6-3 7-6 (7-2) 6-4 in a chak.
A khingpui Czech Republic player Lehecka hi tun tournament a nasa taka invawrh a ni a. Quarter-final lut turin top 12 seeded player pahnih a vaw thla a. Tun tum Australian Open hma hian Grand Slam inkhelah hnehna a la chang ngai lo.
World number 71 ni lai hian seeded number 11 Cameron Norrie leh sixth seed Felix Auger-Aliassime te lakah hnehna chang turin a chiai lova. Inkhel hautakah a tang tluan thei. Tun tumah erawh nidang angin a khel lova, bul a tan atangin Tsitsipas a che tha zawk nghal.
Set khatna world number four ni lai in a thunun hnuah set hnihnaah erawh an inhnehtawk viau a. Tie-breaker-ah Tsitsipas a chak ta zawk.
“Inkhel awlsam a ni lova, fiahna dik tak a ni. Tun tuma ka inkhel hmachhawn tawh zawng aiin tun hi a danglam a, a pawimawh ber erawh hnehna chan hi a ni. Set thum chauh nimahsela a hautak ka ti hle.”
“Jiri hi tun tournament a kheltha hle a, player tha tak a nih avangin a kal zelna turah duhsakna ka hlan.” tiin Tsitsipas chuan a sawi.
A khingpui tur Russian mi Khachanov hian a vawikhatna atan Australian Open semi-final a khel dawn a. Sebastian Korda lakah 7-6 (7-5) 6-3 3-0 a hma a hruai laiin a khingpui hi inhliam avangin a inkhel zawm thei lo.
Kum 1998 a champion tawh Petr Korda fapa Sebastian hi a kheltha chho tan dawn nia a lanlaiin a banrekah hliam neiin a inkhel a nghawng zui a. Medical timeout a lak hnuah danglam chuang lovin a inkhel zo lo.
“Hetianga tawp hi eng inkhelah mah kan duhdan a ni lo. A nat tan hma kha chuan kan inkhel tawk hle. Sebastian a kheltha thei hle a, ka thiante pahnih tun tumah hian a hneh.” tiin Khachanov chuan a sawi.