Lazio in Italy champion lai an mikhual zanah mualpho takin an siam a. 4-0 a hnehin AC Milan hi inelna hrang hrangah a zawnin vawi nga chak result an nei lo mek.
Stadio Olimpico a inkhelah hian Lazio tan Sergej Milinkovic-Savic, Mattia Zaccagni, Luis Alberto leh Felipe Anderson ten goal an khung a. Maurizio Sarri pawlte hi pathumnaah chhovin Milan point khatin an pha lova. League hmahruaitu Napoli erawhin hma an hruai fal tawh hle.
Milan hi tunhnaiah an chet chhiat a kaltluang a. Coppa Italia atang round of 16 a an tlak hnuah kar hmasa khan Supercoppa Italiana-ah Inter Milan in 3-0 in an hneh bawk.
Milan coach Stefano Pioli chuan, “Tunah hian kan team-ah harsatna hrang hrang a awm nual. Tactic lam bakah kan rilru puthmangah pawh a ni a, kan ven theih tura goal chhuah kan nei nual.” tiin inkhel zawhah Pioli chuan a sawi.
Lazio coach Sarri chuan hnehna an chan avangin thil thui tak a thlir duh lo.
“Kan boruak a tha a, beiseina sang tak kan nei. Nimahsela hriatthiam a har chang a awm thin. A chhan chu hmanni lawkah team chhe ber angin min sawi a, zaninah a tha ber angin min chhuah leh lawi a.” tiin a sawi zui.