Ram leh an party MNF-in a thatpui zawk turah ngaiin a hna chelh lai, Officer on Special Duty (OSD) to Chief Minister leh party-a a nihna, MNF President Adviser atangin Rosangzuala’n bânna thehlut.
Mizoram sorkarin thla khata Rs 1 lawmman pea a chhawr mek, OSD to CM Rosangzuala chuan nimin khan a nihna atanga bânna Chief Minister Zoramthanga hnenah a thehlut a. MNF president ni bawk hnenah hian Adviser to the MNF President a nihna atanga bânna a thehlut tel bawk.
A lehkha a thehluhah Rosangzuala chuan Mizoramin inthlanpui a hmachhawn turah ram leh party tana tha zawk tura ngaiin a hna chelh lai chu chawlhsan mai chu a tih makmawhah a ngai tih leh hun tam zawk chhungkaw tan pek a ngaih avangin an hna chelh lai leh party-a a nihna atangin bânna a theh lut tih a sawi.
Bânna a thehluh chungchanga The Zozam Times zawhna chhangin Rosangzuala chuan MNF party-ah leh chief minister lakah lungawi lohna a nei lo tih a sawi a, OSD to CM hna a thawh tan tirh atangin social media-ah sawiselnate a tawh nasat thu leh a hna chelh chungchangah thiknate a tawh nasat avangin nikum lam khan tum hnih ngawt bân a lo tum tawh thu a sawi.
Rosangzuala chuan, “Pu Zorama hnenah hian tawngkain tum hnih bân ka duh thu ka hrilh tawh a, a hmasa zawkah chuan min ngawihsan a, nikum December-a ka sawi leh khan bâng lo turin min ngen leh,” a ti a, tun tumah erawh a bânna chu pawmsak ngei turin tawngkain a lo hrilh lawk tawh tih a sawi a ni.
Mizoram sorkar chuan September 14, 2021 khan Rosangzuala chu OSD to CM hna thawk turin appoinment a pe a, he hna hi state sorkara secretary tlukpui a ni a, lawmman atan thla khatah Re. 1 pek thin a ni.