Kum sarih chhung a zawna a tlakhniam hnuah Myanmar-in opium a siam chhuah chu nikum khan nasa takin a pung leh a, kum kaw chhunga an siam chhuah tam ber kum a nih thu UN chuan a sawi.
Kum 2022-ah khan metric tonne 795 dawn an siam chhuak a, a hma kum chiah, sipaiten mipui sorkar an paih thlak kuma an siam chhuah zat, metric tonne 423 let dawn a tling.
UN chuan siam chhuah a pun hluai chhan hi eibara an hniam thut vang leh himna a awm loh vangah a puh a. Hei bakah hian khawvel pumah heroin siamna atana hman, opium resin man a pun vak vang niin an sawi.
Sipaite helna hian Myanmar-ah hian tual chhung indona tichhuakin tun thlengin a la kal reng.
UN Office on Drugs & Crime (UNODC)-a regional representative, Jeremy Douglas chuan, “February, 2021-a sipaiten thuneihna an chang khan eibar, himna leh sorkar inrelbawlna a thlak dawrh a; a bikin buaina tamna, hmar lama Shan leh ramri hnaih state hmun kilkhawra lo neitute tan opium lam kir bak chu duhthlan tur a awm lo a ni,” a ti.
Ningania report tihchhuah tharah chuan kum 2022 chhung khan Myanmar sum leh pai leh eibar chu a ram chhunga thil thleng leh ram pawna thil thlengin a nghawng na hle tih tar lan a ni a. Russia-Ukraine indo te, politics mumal awm leh thil man sang lutuk te chuan lo neitute chu opium-a kir leh lo thei lovin a siam nia tar lan a ni.
Myanmar hi Afghanistan dawta khawvela opium thar chhuak hnem ber ram a ni a. Ram pahnihte hi khawvela heroin siam chhuah zawng zawng deuhthaw an opium hmanga tumtu an ni.
UN-in a chhut dan chuan Myanmar ram opium sumdawnna hi $ tluklehdingawn hnih vel a ni a, a ram chhung leh a chhehvela a sum che chu $ tluklehdingawn 10 vel lai a tling thung.
Hetih lai hian kum 10 vel liam ta atang khan opium chin thlakna kalpui niin a ram eibar dinhmun tha hret hret nen, an thar chhuah a tlem tial riak thung.
UN-in kum tina opium survey a neih thinah nikum chhung khan an thar chhuah a pung leh ta hluai a. Kum 2013 khan metric tonne 870 tharin he mi hnua an thar tam leh ber tum an tawng leh ta hial a ni.