Wimbledon champion Elena Rybakina chuan Grand Slam title lak belhna hun a nei dawn a. Australian Open final Belarusian mi seeded number 5 Aryna Sabalenka nen an inkhel dawn.
Kum 23 mi Rybakina hian vawi hnih champion tawh Victoria Azarenka chu Ningani khan 7-6 (7-4) 6-3 in a hneh.
Seeded number 22 ni lai Rybakina hian a Grand Slam final vawi hnihna a khel dawn a. Nikumah All England Club-ah a hlawhtlin hnuah tennis khawvelah a invawrh leh dawn.
Feet 6 a sang, ball vaw na leh thiam tak Rybakina hi Wimbledon champion nimahsela a inti lar lo hle a. Amah ngei pawhin mi zakzum a ni a, mi hriat leh ngaihven nih chu a hlau letling niin a sawi thin.
Wimbledon champion nimahsela nikum inelnaah point an pek loh avangin WTA rankings-ah a san tur angin a sang lova, seeded 22 a chang thei chauh a ni.
Kumin Melbourne a inelnaah che tha berte zing ami a ni a, final a luhna kawngah tennis hmuhnawm khelin world number one Iga Swiatek a hneh bakin nikum final khel Danielle Collins leh 2017 French Open champion Jelena Ostapenko te a hneh.
A khingpui tur kum 24 mi Sabalenka hi thahrui ngah leh ball vaw na ve tho a ni a. Magda Linette chu 7-6 (7-1) 6-2 a hnehin a vawikhatna atan Grand Slam final a khel dawn.
Sabalenka hi WTA Tour a player hmasawn zing ami a ni a, nimahsela Grand Slam inelnaah semi-final pel thei ngai lovin tum thum last 4-ah hian a zinkawng a tawp tawh a. Inrinni zanah ball vaw na pahnih inkhel turah a la thlen ngai loh thlen a tum dawn.