Nilaini chawhnua Hrianghmun khuaa kangmei tuarte chu bialtu MLA, Dr L Thangmawia’n tlawhin sorkar tih theih apiangah theihtawp chhuah a nih tur thu a hrilh a. In kang ral vek chhungkaw palite chu Rs 5000 theuh leh in kang ral lo chhungkua Rs 2,000 a pek bakah silpouline pakhat theuh a pe a, Hrianghmun khawtlang hruaitute hnenah hnatlang thingpui lumna tur Rs 3,000 a pe bawk.
Hrianghmun khuaah kangmei chhuakin chenna in a kang tih a hriat ve leh bialtu MLA chuan Hrianghmun khua hi pan nghalin, khawtlang hruaituten chhiatna thlen dan te an lo hrilh a. Kangmei chu Nilaini chawhnu dar 1:40 velah Khamdopaua in atanga chhuak a nih thu leh a thenawm in pahnih, Pausianliana leh Chin-eni te in bakah kawng chhak lama Liandala in pawh kangkaiin heng in lite hi a kan ral vek bakah tractor pakhat a kan chhiat thu an sawi.
Kangmei hian thenawm, Kaituanga in pawh kang kaiin a bang sir khat leh in chhung bungraw thenkhat a kang a, a dang a kan kai zel hmain mi tlawmngaiten an thelh mit ta niin Hrianghmun khawtlang hruaitute chuan an sawi a. Kangmei chhuak hian vawk pali kang hlumin pathum a kang hliam a, buh tin 700 vel a kang tel a, a thil tihchhiat hlut lam hi Rs 38,89,250 nia chhut a nih thu an sawi bawk.
Hrianghmun khawtlang hruaitute chuan Mimbung leh Teikhang khuate, Ngopa RD block VC association te, 2nd Assam Rifles Mimbunga mi te, bialtu MLA, Saitual DC, Ngopa BDO leh Ngopa Police ten kawng hrang hrangin an tanpui tih sawiin, an lawm thu an sawi a ni.