Aizawl: MNF party atanga Siaha bialtu MLA Dr K Beichhua chawlhtir a nih nghawng kal zelah nimin khan Siaha district MNF party president hlui, C Lawbei leh District MNF Adviser K Beisa, MDC hlui bakah, Siaha Vaihpi I leh Vaihpi II MNF unit hruaituten bânna an theh lut.
Bânna thehlutte hian Siaha district MNF president hna chelh lailawktu a awm loh avangin Siaha MNF Generel Secretary K. Lalchhanhima hnenah ziakin an theh lut a ni.
Mara Autonomous District Council (MADC)-a MNF leh INC thawhdunna sorkar chhiat chhana mawhphurhna latu, Siaha District MNF President C. Lawbei chu November 30, 2022 khan district party president atangin chawlhtir a lo ni tawh a, MNF party member a nihna atangin bânna a theh lut a ni.
C. Lawbei hian a bânna lehkhaah a dam chhunga MNF ni tura a beisei laiin thawhpui tlaka an ngaih loh avangin a nihna bân a ni a. Hei vang hian atan MNF party chu awm zelna tlaka a ngaih loh thu a tar lang.
C. Lawbei leh K Beisa rual hian Siaha Vaihpi I MNF unit hruaitute – President Laisa Khithie, Vice President HC Beizachhi, Secretary pahnih LC Beibyhnarrohna leh Byahna Chozah, Asst Secy pali – HC Beihrosia, J Beichatlaingia, Ellen Jothyu, NT. VB Byhnatha, Fin Secy N Beihneiro leh Treasurer Dellevans Hlychho bakah executive committee member paliten MNF atangin bânna an theh lut.
Siaha Vaihpi II MNF unit hruaitu, President H Beihmosia, Vice President Grace Khithie, Secretary A. Zebulon, Asst Secretary M. Nehemia, Fin. Secretay K Beilotha leh Treasurer H. Hrosa te bakah executive committee member parukten unit hruaitu nihna leh primary member an nihna atangin bânna an theh lut ve bawk.
Siaha district MNF party chhung buaina kal chho mekah MNF atanga bânna la theh lut tur hi District MNF-a general secretary leh adviser rual eng emaw zatin an la tum nia thudawn a ni.