Inter Milan chuan Coppa Italia-ah an champion trophy humhim turin ke an pen a. Thawhlehni zanah semi-final lut turin 1-0 in Atalanta an hneh.
San Siro a inkhelah hian Inter tan hian defender Matteo Darmian chuan second half-ah inkhel a goal awmchhun a khung a. Zanin a Juventus leh Lazio inkhel a chak zawk nen final luh an inchuh ang.
Quarter-final inkhel hautakah Inter hi first half a che tha zawk nimahsela goal-ah an hlauhawm tawk lova. Hakan Calhanoglu huntha neih chu goal ankhung teuh ber a ni.
Second half-ah penalty area hmawra vengtu nei lova awm Darmian-a’n a chance neih a chhawr a, hnehna an chan theih phah.
Inter Milan Coach Simone Inzaghi chuan season hlawhtling an hman theih thu a sawi zui a. “Semi-final hi luh ngei ngei kan duh a, tunah Italian team zingah inelna kan telna zawng zawng a la dam awmchhun kan ni tawh.”
“Zanin inkhelah a tir atanga a tawp thleng khan kan kheltha a, felfai taka kan khelh bakah a huai zawkah kan tang zel.” tiin a team a fak.