United States chuan an sipaiten nikuma beihpui an thlakna hrang hrangah civil mi 23 an thi niin an sawi a, tlawmngai pawlten an sawi zat erawh a tam hle.
Civil mi an thah zingah hian Iraq, Afghanistan, Somalia, Yemen leh Nigeria-a beihpui an thlaknaa mite pawh an tel tih Pentagon report-ah tar lan a ni.
US Department of Defense (DoD) chuan, “Civil mi 23 vel an thi a, 10 velin nikum chhunga US sipaite beihpui thlakah hliam an tuar,” tiin Congress-in kum 2018 atanga a phut anga kum tina report an siamah an tar lang.
Civil mi thi tam ber hi Afghanistan niin Pentagon chuan 20 an thi niin a tar lang.
Somalia-ah February, 2020 leh Iraq-ah March thlaah mi pakhat ve ve an thi bawk niin tar lan a ni a. Mi pakhat dang hi khawia mi nge tih hriat a ni ve lo.
DoD-in report a siamah hian nikum khan Congress-in an sipai chetna avanga civil mi thite ral nan an chhungte hnena pek turin Pentagon kutah $ maktaduai thum a hlan tih tar lan a ni a; mahse, zangnadawmna hi pek a ni miah lo thung.
Khawvel hmun hrang hranga US sipaiten beihpui an thlaknaa civil mi thi hi sorkarin a chhinchhiah zat leh pawl dangten an chhinchhiah zat a inang lo thin hle.
Tlawmngai pawl pakhat, Airwars chuan Pentagon-in an chhinchhiat let nga dawn, mi 102 zel civil mi an thi niin a sawi.
United Mission in Afghanistan (UNAMA) chuan Afghanistan bikah ringawt US kaihhruai tangrual sipai chetna avangin civil mi 89 an thi a, mi 31-in hliam an tuar niin a chhinchhiah tih Airwars hian an sawi.
Somalia-a mi pakhat chauh thi anga chhinchhiah pawh Airwars leh tlawmngai pawl dangte chuan mi pasarih an thi niin an sawi a. Syria leh Iraq-ah pawh mi paruk ve ve an thi bawk niin an sawi.
American Civil Liberties Union (ACLU)-a an hotu pakhat, Hina Shamsi chuan, “Defense department-in a chhuina leh a tak taka civil mite tawrhna hi a inthlau hle a ni,” a ti.