Ram hmasawnna atana pawimawh ber pakhat chu kawngpui tha hi a ni ve ngei ang. Mizoram ang, tuipui/lawng hmanga engmah a lak luh ve theih lohna hmun angah phei chuan a pawimawh a; chutih laiin kan ramah hian kawng chhia tih thawm hi hriat tur a awm fo thin.
Kan kawngpui a chhiat chhan ni thei awm chu tam tak a awm a, a chhan hrang hrang erawh hi chu siam that theih leh kalphung thlak theih tak tur chu niin a lang a ni.
Kan ram hruaitute pawhin kan ram chu ruahtui tamna a nih avanga alkatra a chhiat chak avangin a theih ang chin chin cement concrete hmanga siam zel niin an lo sawi tawh thin a, a thatna chin erawh a awm ngei ang. Puhmawh tur kan zawng a nih chuan a awm reng dawn, cement concrete hmanga siam zel theih a nih chuan nasa takin kan harsatna tawh fo thin tam tak hi chu kan tikiang theiin a rinawm a, chhunzawm chhoh zel pawh tum se a fuh mai thei.
Fur a nih dek dek tawh chuan kan ram kawng hi a chhe thei hle mai a, lirthei hmanga eizawng leh zin veivak hrim hrim tan pawh kal ngam a ni lo fo thin. Eng party pawh sorkar se kan mutan hi a ni reng mai a, tu party mah hi insawisel tawn thei chu an awm awm lo e. Kan harsatna tawh hi heti reng a nih avang hian fur lai pawha kawng tha kan neih reng theih dan hi zawn a hun tawh hle a ni.
Kawng chhiat chhan puhmawh tur bik chat sawi tur sorkarin a hre lo a nih pawhin a chhan awm theite zirchiana a that theih dan zawn hi a hun tawh hle. Khuarel chhiatna, leimin leh tuilian vangte hi chu a hriatthiam theih mai. Mahse, ruahtui tlak hleka chhe mai zelte hi a chhan zawnchhuaha a tihfel dan zawn hi a har lo ang.
Hmun thenkhata PWD hnathawhte pawh hi sawisel loh theih loh hi a ni thin bawk a, arpui no hruai thaikhawk theih hi a ni fo mai a, motor lian deuhin vawi hnih khat an han zawha chhe thei mai hi a la awm reng bawk. Hetiang a nih zel ai chuan cement concrete hi uar a, puhmawh tur bik kan hre lo a nih pawhin tha taka, hun rei zawk daih thei tura siam hi a hun tawh hle a ni.