Ligue 1 club hlun zing ami Olympique Marseille in French Cup semi-final an thleng zo lova. Ligue 1 club Annecy kutah penalty hmangin an tlawm.
Nilaini zan Coupe de France quarter-final inkhelah hian Marseille in anni aia league hniam a awm hi Stade Vélodrome-ah an lo mikhual a. Inkhel pangngaiah 2-2 in an inhnehtawk.
Paris Saint-Germain paihchhuaktu Marseille hi champion tura rinkai an ni a, nimahsela an khingpui quarter-final la lut ngai lo te lakah an mualpho.
First half-ah Marseille tan Jordan Veretout chuan a kum 30 tlin ni ah goal hmahruai a khung a. Hei hi second half tan tir lamah Annecy tan rawlthar Ivorian striker Moise Sahi chuan a sut.
Annecy zawkin an defender Kevin Mouanga hmangin hma an hruai zui a, French defender palian hian an goal hnihna a tauh lut.
Marseille in si phurh sutna huntha neiin handball avangin penalty an hmu a. Mahse Alexis Sanchez chuan a khung thei lo.
Minute 96-naah erawh rawlthar substitute Francois Regis Mughe chuan an si phurh a sut hram a. Extra time khelin goal a luh belh loh hnuah penalty hmangin chak zawk an zawng.
Penalty an petin Annecy tan Ahmed Kashi chuan a hmasa ber pet gal lo mahse midang zawngin an khung vek a. Marseille tan Nuno Tavares chuan a vawi thumna a khung loh hnuah Leonardo Balerdi chuan an penalty vawi 8-na a khung lova, a tlawm zawkah an tang.
Annecy coach Laurent Guyot chuan, “Kan result hi a ropui a, hetiang hun hi football kan khelh chhan chu a ni. Ka player te ka lawmpui a, tam tak tan Ligue 2 hi thil thar a ni a, an football zinkawng bul tanna tlawm ve tak tak te an ni ve hlawm. He result avang hian kan haw lam chu kan hlim hle ang.” tiin a sawi.