Premier League hmahruaitu Arsenal in kuminah champion trophy an umna kawngah paihthlak tumte tan an beih ve fe a ngai dawn tih an lantir leh a. Everton lakah goal li khungin an sawp.
Nilaini zana Emirates Stadium a Premier League inkhelah table mawng lama tlak hlauhawm a awm mek Everton in theihtawp chhuahin Gunners hi dang rei mahse halftime hma minute nga a la awmin an tang thei tawh lova. Bukayo Saka chuan Oleksandr Zinchenko ball siamsak goal a a khung hnuah Arsenal an pawng tual tual.
Halftime dawnah Arsenal in inkhel an dahtha tluk a ni a. Saka bawkin Idrissa Gueye chu ball chhuhsakin Gabriel Martinelli a pe a. Brazilian winger hian goal-ah khungin VAR hmanga endik a nih hnuah offside an phar chu sut a ni a, goal-ah an pawm.
Second half-ah Everton hian Arsenal chhanletna tur an nei lo. Gunners captain Martin Odegaard chuan a zawna vawi thum hnehna an channa turin minute 71-naah an goal thumna a khung a. Leandro Trossard chuan a siamsak.
Huntawp hma in Gunners hian an goal difference tih thatna turin Martinelli bawkin goal a khung leh a. Eddie Nketiah ball cross chu a lo thai lut.
Arsenal manager Mikel Arteta chuan, “Kan result hi a lawmawm a, a bik takin Manchester City laka kan khelh tlem zawkna inkhel a nih avangin kan tan chak a pawimawh zual. Kan khingpuite hian inkhelh an ti harsa thin a, Goodison Park-ah hei hi kan hre tawh.”
“A tirah khan harsa ti mah ila a rei deuh a kan tih tur kan hriatchian hnu khan hma kan sawn a, goal hmasa pahnih kan khung hun khan engkim a thlak danglam.” tiin an chak hnuah a sawi.
Liverpool an nung e
Season tawpah a sang pali zinga tel thei turin beiseina thar an insiam a. An harsatna tawhten kiam lam a pan tih Liverpool in lantir in Wolverhampton Wanderers 2-0 in an hneh.
Anfield-ah Jurgen Klopp-a pawlte hian Darwin Nunez-a goal pawm loh an neih avangin an vanduai zan an tawng leh dawn nia ngaihna a awm hman. Mahse second half-ah captain Virgil van Dijk chuan Diogo Jota cross tauh lutin goal a khung a. Mohamed Salah chuan Konstantinos Tsimikas ball cross goal-ah khung belh nghal thuai bawkin Reds an chak awlsam.
Hnehna an chan avangin Reds hi paruknaah an inhlangkai a, palina a awm Tottenham chu point ruk chauhin an pha lo mek.
Inkhel zawhah Klopp-a chuan, “Kan inkhel pumpui thlir khan kan tan inzirna tur tha tak a awmin ka hria. First half kan khelchhe lova, kan duhdan angin kan inkhel thei. Chance tha erawh kan siam tam lo. Second half-ah nasa zawka kan nawr theih avangin kan chak.” tiin a sawi.