- MC Lalthianghlima
Ni 16. January. 2017 (Thawhtan ni) a Mizo hnam rûn (MNF Gen.Hqrs office) hawn a nih nî-ah khân, vawiina sorkarna fawng chelhtu MNF party chu opposition an la ni a, chutah chuan MNF President Pu Zoramthanga (Tûna kan chief minister ni ta) chuan kumthar thuchah ngaihnawm tak a sawi a.
Pu Zoramthanga chuan “Kum 2018 inthlanpui-ah sorkarna kan siam theih ngei Pathian leh mipui zârah kan beisei a. Kan hna hmasa berah MIZORAM THAR leh sorkar danglam tak siam kan tum a, hemi atân hian mipui eizawnna leh hlâwk tham law law siam sak a nih theih nân thawktute leh mithiam bîkte’n uluk takin Socio Economic Developement Programme (SEDP) an siam a. Chutah chuan mipui eizawnna ngêlnghet neih theih nân sorkarin CHENG NUAIH THUM aia tlêmlo emaw, an mamawh zât ang zêla buatsaihna tur sum a pe dâwn a. Mipuite’n kumtin cheng nuaih têl an lâkluh theih nân SEDP hi hlawhtling ngei tura kalpui kan tum a ni” a ti a.
Heta “Mizoram thar leh sorkar danglam tak siam kan tum” a tih hi SEDP hmanga mipui eizawnna ngêlnghet neih theih nân sorkarin, chhûngkaw khatah cheng nuaih thum áia tlêmlo emaw, an mamawh zât ang zêla buatsaihna tur sum a pe dâwn a. Mipuite’n kumtin cheng nuaih tel an lâkluh theih nân SEDP hi hlawhtling ngei tura kalpui an tum thu a sawi hi ni ngeiin a lang.
Tichuan, kum 2018 inthlanpui ah chuan Mizoram mipuite chuan MNF party ah beiseina sâng tak neiin, hneh takin sorkarna kan pê a, a chhan ni bera lang chu SEDP-Cheng nuaih thum vang kha a ni. Tunah hian Pu Zoramthanga kaihhruai (MNF) sorkar chuan an term an hmang zo ruai chu a ni ta der mai. Mizoram mipui-in kan nghahhleh leh sorkarna fawng kan chelh tirna chhan ni a lang SEDP-Cheng nuaih thum (Chhûngkaw khat chanpual tur) chu kum 5 dâwn a lo ral hnu pawhin kan hmu ta si lova, kan hmuh pawh a rinawm heklo. Achhan chu Open Market Borrowing (OMB) hmanga loan cheng Vbc 940 pûk chung leh Health care bill bâ cheng Vbc 65.90 nei chung hian, kan sorkar hrawn mêk hian SEDP-Cheng nuaih thum hi min pe thei lovang tih hi “Ka mit, ka beng” tih tluka chiang a ni ta, mipui pawhin beisei tawh loh law law chi a ni. Hlawhchham run dâl-ah, chhungkaw 60000 hnênah cheng 25000 an sem chhuak thei hram erawh lawmpui ila, amaherawhchu zukchal kah tumin, hleipui-kapsen ringawt an ak haw tur hi chu a lungchhiat thlak lam deuh chu a ni e.
Chu mai a la ni lo, sorkarna an chelh hlim hlawt, kum 2019 kum tirah khân Chief Minister Pu Zoramthanga chuan Mizoram chu, khawizu leh hnute tui luanna ramah siam an tum thu Horticulture department-a officer-te inhmuhkhâwmna ah a sawi bawk. A sawi zêlna ah C.M Pu Zoramthanga chuan, ep-tu (opposition) an nih laiin hmasâwnna hnathawh dan tur an duan lâwk vek tawh thu leh raw lian chi, hmun danga awmlo chîn an tum thute a sawi a.
Vawiinah hian Mizoram chu khawizu leh hnute tui luanna ram ah chuan min hruai thleng ta em le? “Chhût thiam chuan chhût rawh se” tih ang deuh khân, sawi tam ngai lovin “Chhût thiam chuan chhût rawh se” kan ti ve mai a ni ang chu. Khawizu leh hnute tui luanna ram a chên chu sawi loh; Mizoram khawtin-a chhûngkhaw tam zawk chu nîtin eichawp dapin kan la buai êm êm a, zanriah thlâk tur kan tlachham lo chauh a nih hi maw!.
Hetih mêk lai hian, kan chief minister chuan Mizoram-in potential tha tak kan neih thu leh ram hausa a kan siam theih thu chu ni 18. 2. 2023 (Inrinni) a Sêrchhip college administration building sak tur lungphûm a phûmna a la sawi dat dat a, sorkar term erawh a tâwp chu a ni ruai tawh si. Mâu/rua chi danglam takte, chakâi farm etc.. min hawi-sana, cheng Vbc tam tak khawhral duai duai lo khân, kan ramin potential tha tak a neih leh ram hausa a siam theih a nih zia hi, tlâi khawhnua sawi hnuhnawh lovin, sorkarna fawng an chelh tûk atang khân “Bâwng insi ang phata” dâwn awm hauh lova beihpui thlâk nghal mai tur kha a nia. Chhûrbûra leh Nahaia chêngkek lo turte pawh kan ang âwm a sin.
Engpawh nisela, tûn sorkar term kal mêkah hian “Zoram thar danglam tak” leh “Khawizu leh hnute tui luanna ram” kan Pu in min kawhhmuh chu “Mahse kan tân vân-a rah ang, engtikah mah kan theih ve loh tur” a ang ta hle, sorkar term kal mêk chu a ral mêk ta si a.
Chhûngkaw pa ber hian, a nupui fanaute leh chhûngkhat bulah, a duhthusâm, a zêldin thu hi titakzetin, ha-hîpin sawi fo ta sela a sawi ang chu a taka thleng awm mang si lo se, a nupui fanau, chhungkhat mai ni lo, an khawtlâng chuan innghahna tlak tak takah ngai lovin “A sawi leh tur pawh dâwt bawk” an ti ngei ang.