Hmarchhak state pathum – Sikkim, Arunachal Pradesh leh Manipur chief minister-te chu inkawm khawmin hmarchhak pum huap leh an state theuhva muanna leh hmasawnna a awm theih dan tur an sawiho.
India hmarchhak hian Prime Minister Narendra Modi-a kaihhruai BJP sorkar chu an rintawk thu an sawi bawk.
“Rama a thana hma a sawn zelnaah hmarchhak chu a thawhhlawk ber zinga mi ni zel turin kan duh a ni,” tiin ngaihdan thuhmun an siam.
Manipur Chief Minister N Biren Singh chuan Sikkim leh Arunachal Pradesh chief minister-te nena an inbiak hnuah hmasawnna tur thil hrang hrang an sawi a, chu chu a rilru leh thinlung kaptu ber a nih thu a sawi bawk.
Manipur chief minister chuan, “Arunachal Pradesh Chief Minister Pu Pema Khandu leh Sikkim Chief Minister Pu Prem Singh Tamang te chu Agartala-a sorkar lak luhnaah an tel a. Anni nen hian inkawmhona hun hlawk tak kan hmang a ni,” tiin Twitter-ah a tar lang a ni.
BJP hruaitu, Manipur chief minister hi tun hnaia Tripura-a assembly inthlanah khan campaign-in a pui nasa hle a, “Tripura chief minister atana Dr Manik Saha lak luh a ni leh ta hi ka lawmpui a. I inpekna leh i kaihhruaina hnuaia dan leh thupek kenkawhna hi tluk rual a ni lo va. PM Narendra Modi-a hmathlir leh tum angin Tripura hian hmasawnna sawisen rual loh a hmu dawn a, duhsakna sang ber ka hlan a che,” tiin Twitter-ah hian a tar lang bawk.
N Biren chuan Tripura chief minister atana Saha lak luhnaah hian Prime Minister Narendra Modi, Union Home Minister Amit Shah, BJP President, Shri JP Nadda, hmarchhak state dang chief minister leh mi pawimawh tak tak nen Agartala-a Raj Bhavan-ah an tel thu a sawi bawk.
“Tripura leh hmarchhak state danga chengte hian Pu Modi-a kaihhruai BJP sorkar hi kan ringin kan innghahna a ni a, ramin hma a sawn zel rualin hmarchhak pawh hi a thlawhhlawk ber pawl a ni zui zel dawn a ni,” a ti.