Ineos hotu ber ruahmanna hnuaia pawisa hmanna tihtlem a nih avangin Manchester United chuan Old Trafford-a hnathawktu 30% vel an bân tawh.
Manchester United chuan Sir Jim Ratcliffe-a pawisa hman tihtlem tumna kawnga hmalakna atan an club hnuaia hna 322 an tihtawp thu an puang a ni.
2025-26 chhunga an sum dinhmun kimchang an tihchhuah danin June 30 thlengin kum hnih chhung khan hnathawktu zat chu 1,127 atangin 805-ah an tlahniam a, hei hi 28.6% a tling.
Hna tihtawp tamna ber hi in-house media leh commercial department-ah a ni a, department pahnihah hian hnathawktu hi 45% leh 44%-in a tlahniam a. Administration leh a kaihhnawh department dang, ticketing tiamin, hnathawk 161 tihtawp a ni a, football staff zinga scouting leh academy coaching enkawltu mi 60 velin hna an hloh bawk.
Glazer chhungkua atanga share a lei hnuah Ratcliffe hian February, 2024 atang khan Old Trafford-a inenkawl dan kalphung thlak danglam tumin thuneihna a inpe lian a, pawisa hmanna tihtlem chu uar taka kalpui a tum ta a ni.
United hian 2025-26 chhungin inkhelh nia a tula chhawr turin a nghet loin hnathawk mi 2,614 an chhawr a ni.
Ratcliffe-a’n hna tihtawp a ruahman chhan hi squad-a sum tam zawk hman theih nan a ni tiin a sawi a. Kum 2024-a £ maktaduai 70 vel an hloh atanga kumin June 30 thlenga hlawkna £ maktaduai 22.6 an hmuhnaah a tangkai hle.
Kum liam taah khan hlawh hman ral zat chu £ maktaduai 302-ah a tlahniam a, club-in Champions League an khelh leh tak avang leh player-te hlawh a pun avangin kuminah hian a pun a rinawm a. 2025-26 chhungin chhiah pek hmain £ maktaduai 47 an hloh tho a, ba tam tak nen an club chu enkawl chhoh a nih miau avangin kum sarih chhung chu a zawnin hloh an nei ta a ni.