Aizawl: Covid-19 avanga kum hnih an hman theih loh hnuah nimin khan Mara mipuiten kûtpui bera an neih leh an hlut em em, Lyuva Khutla chu Siaha khawpui leh Tipa-ah ropui taka hman a ni.
Siaha-ah chuan District Lammual-ah hman niin Kût Pa chu MADC CEM M Laikaw a ni a, Tipa-ah T. Seido, MADC, EM Sports, etc-in a hmanpui bawk.
Siaha-a kût an hmanah Kût Pa chuan kût puanzar a pawt chhoh hnuah thuchah sawiin, “Mara fate kohhranah inpumkhat kim rih lo mah ila, hnamah kan inlungrual a, tlawmngai pawl hrang hrangah rilru hmun khatin kan awm a, vawiin kût pawh hian kan inlungrualna tinghet sela, kan hnam ziarang chawi vula tithang lian zel turin mipuite ka chah a ni,” tiin kût hmang turin mipui duhsakna a hlan.
He hunah hian Col. Bejoy R. SM, Commandant, 3 (NH) BN Assam Riffle pawhin kût lawmna thu tawi sawiin, vantlang mipuite hmasawn nan theihtawp chhuahpui zel a tum thu a sawi a. Rualbanlote hman tur wheel chair pathum a hlan nghal bawk.
JB Chozah, Secretary, Organising Committee-in lawmthu sawiin Organising Board Chairman K. Chhihrau-a’n kût puanzar pawt thlain kût a khar.
Kût lawmnaah hian MADC Golden Jubilee lawm nan mi ruat bikten darkhuang vawi 50 an vua a, MTP branch 14-in a huhovin hnam lâm, Sawlakia an an entir a. MCHP branch 12-in a rualin costume parade an entir bawk.
Hnam lâm chi hrang hrang entir zui a nih bakah Mara hnam inchei chi hrang hrang hmangin an entir atang hian Khutla nula leh tlangval (Chhivaw & Khydi) thlan a ni a, hei bakah hian mipa leh hmeichhe naupang hnam inchei mawi leh nalh (Saliah Beino & Beipaw) thlan an ni bawk.