National Consultant – PMTBM- BA, Central TB Division (CTD), Ministry of Health & Family Welfare D. Dharma Rao-a’n nimin khan Larsap Hari Babu Kambhampati chu Raj Bavan-aah hmuin, PM TB Mukh Bharat Abhiyan hnuaia Mizorama hmalakna hrang hrang an sawidun.
TB patient nutritional support program atana sum thawhtu Larsap chuan sum hmanga TB natna vei te chaw tha hluitu zawng zawng te lawmthu hrilhin, “Mizoram chu kan la vannei a,TB vei pawh mi sangkhat chuang vel chauh kan la nih avangin tan lak deuh chuan TB vei ei leh in tha mamawhtu zawng zawngte kan puih vek theih a rinawm” a ti a. MLA te, mipui aiawha thlan tlin body hrang hrang te, college hnathawk leh sorkar hnathawk dang te pawh he rawngbawlna huangah hian lut zel turin a ngen.
Governor chuan State TB Cell chu mipui kaihruaitu pawimawh tak kohhran hruaitute leh tlawmngai pawl te phungbawmna sawm turin a chah bawk.
Sorkar thuchhuahin a tarlan danin Mizoramah TB natna vei, inenkawl mek mi 1321 an awm mek a. Heng damlo zinga mi 989 te chuan chawtha leina atana tanpuina an mamawh a. Tun thlenga TB natna vei te tanpuina atana Nikhshay Mitra program kaltlanga sum thawhtute mi 400 niin, TB patient pakhat tana chawtha (nutrition) atana senso chu mi pakhat tan thlakhatah Rs 650 anga chhut a ni.
Mizoram Larsap chuan TB vei mi 20 tan an chaw tha leina tur pawisa a thawh mek tih sorkar thuchhuah chuan a tarlang a. Ram hruaitu zingah Helath Minister Dr. R. Lalthangliana, Ho- me Minister Lalchamliana, MLA Er. H. Lalzirliana leh Dr. K. Beichhua te pawhin an thawh mek bakah LADC leh MADC hotute zingah pawh he rawngbawlna a tel an awm nual a, sorkar hnathawk zingah he rawngbawlnaa tel doctor an la tam ber rih niin sorkar thuchhuah chuan a tarlang bawk.