India-in ram dang atanga ralthuam a lak luh zinga Russia ta a lei chu kum 2017 leh 2022 inkara nasa taka tlahniamin 67% atanga 45%-ah tla mah se Moscow hi Delhi-in ram venhimna hmanrua a dawr tam ber ram a la ni tho.
France chu India-in ralthuam a lei zawng zawng zinga 29% thawhtu niin Russia dawta a dawr tam ber an ni a. A ralthuam chawk luh zinga 11% chu US hnen atanga a lei a ni bawk tih Stockholm International Peace Research Institute (Sipri) chuan a tar lang.
Zirchiangtute chuan India hian ram dang atanga ralthuam a lei thin chu 11%-in hniam tawh mah se khawvel ram zinga ralthuam lei nasa ber a ni a la ni tho.
Delhi hian ram dang atanga ralthuam a chawk luh thin chu tihhniam hret hreta ama siam ngei innghah nan hman leh mahni rama siam chhuah tam theih a tum mek.
Mi thiamte chuan Russian ralthuam a lak luh tlem tak hret chhan hi India-in leina tur dang a zawn mek avang leh ama kutkawih ngei hman tam a tum vang niin an sawi.
Sipri chuan ‘ralthuam siam ve dang ramte an tan zel avang leh India-in amaha a siam chhuah tam ve tawh’ avangin a dawr tam ber, Russia hi Delhi laka a dinhmun a derthawng mek niin a sawi a. Hei bakah hian ‘Russia-in Ukraine a run avanga a ralthuam hralh thin a tihtlem hret bawk’ vangin a hralh tlem niin an sawi.
Hetih lai hian France-in India hnena ram venhimna lam hmanrua a hralh chu kum 2013-2017 inkar aiin 2018-2022 chhungin 489% zetin a tam zawk tih report-ah hian tar lan a ni a. France hi US leh Russia dawta ram danga ralthuam hralh tam ber niin China leh Germany chungah a awm hrim hrim a ni.
Delhi-in France hnen atang hian indo thlawhna 62 vel leh tuihnuailawng pali a leisak niin Sipri chuan a tar lang.
Russia hnen atanga India-in ralthuam a lei zat a tlahniam hi Ukraine indona avanga Delhi-in ram dang atanga nawrna na tak a tawh mek laia thleng a ni.
Moscow hi kum tam tak chhung chu India nena inkawmngeih tak ram an lo ni reng tawh a, ram venhimna lam thilah phei chuan an thawkdun rei tawh hle a. Indian Army hi Russian siam tank leh rifle hmang tamtu an ni a, air force pawhin Sukhoi fighter jet leh Mi-17 helicopter an hmang nasa hle bawk.
Delhi-in tun thlengin Moscow-in Ukraine a run chu demna thu a la sawi duh lo va; mahse, ‘UN Charter, international law, leh mi ram chin leh inrelbawlna hrang nei zah’ a tul thu erawh a sawi tawh thin.
Tun hnai lawka Delhi-a G20 palai lawk tak takte thutkhawmah pawh inrûn duh lotute leh Moscow inkarah boruak sang tak a awm a ni.