Serie A club Inter Milan in kum 2011 hnua a vawikhatna atan UEFA Champions League quarter-final an khel dawn. Round of 16 first leg-ah 1-0 a an chak tawh chu an hlawhtlinpui a, second leg-ah an goal an ven nghehzia lantirin FC Porto nen goal inpe lovin an inhnehtawk a, 1-0 aggregate in an chak.
Inter hian San Siro-ah goal khat a chak chungin hma an hruai a, hei vang hian Estádio do Dragão-ah goal chhuah loh a pawimawh tih an hria.
Huntawp dawn hun pek belh a thlen hma zawngin Inter in harsatna lian an nei lo. Goal nawr lam aiin a ven lamah an insawrbing a, mualneitu lamin an thiat hleithei lo.
Mahse inkhel tawp dawnah erawh an lamah vanneihna a tan a ngai. A tawp boruak a pui hle.
Porto tan Ivan Marcano chuan goal a khung mai dawn nia lang hman tawh chu Denzel Dumfries chuan goal line atangin a lo pet chhuak hman hram a. Hemi hnu hian Mehdi Taremi leh Marko Grujic ten goal ban leh goal bar an tauh per leh ve ve bawk.
A tawp erawh Nerazzurri an tang tluan thei a. Porto defender Pepe hnawhchhuah a nih hnuah Portuguese club tan beisei tur a awm tawh lo.
Italian football chu
Khawvel football a Italy in hnuhma a hnutchhiah lian tak chu a tul hunah hlawhtling taka ‘ultra-defensive game’ khelh a ni.
“Catenaccio’ tactic tichhuaktute hian European football-ah an hlawhtlinpui tawh.
Inter Milan ngei pawh he tactic hi lo hlawhtlinpui tawh niin kum 2010 khan Jose Mourinho hnuaiah UEFA Champions League hi an chawi tawh.
Thawhlehni zanah an hmahruaina humhim turin an inrem a. Simone Inzaghi in a tlarhnungah Matteo Darmian, Francesco Acerbi leh Alessandro Bastoni te dintirin a sirah Federico Dimarco leh Dumfries ten nidanga tlarhma an hnaih zawk anga khel lovin an tawngpawng tlanchhuah ngai lo.
Midfield-ah Nicolò Barella a thawkrim a, an inkhel khawlpui berah a tang. Chutihrualin amah thlawptu ball thiam pahnih Hakan Calhanoglu leh Henrikh Mkhitaryan ten ‘risk’ lak a ball hloh aiin fing leh felfai taka ball an chan chu hman an tum a, an hlawhtling fo.
Coach Inzaghi chuan a player te inpekna fakin, “Kan result-ah ka lawm a, kan tling hi ka hlim hle. Ka naute ho khan khatiang ang em em a inpe tur khan thahrui an neih pawh ka ring tawh lo zawk a, ka rin phak bakin an tha leh zung an seng.”
“Kan ding nghet tlat a, kan inremdan kha an thiat miah lo. Kan tanrual zel bakah kan tlawm khawm tlat avangin kan chak a, a tawp dawn erawh kan vannei.” tiin a sawi.