Siang phaikuama dam lian tak sak mek duh lotu langsar ber, Siang Indigenous Farmer’s Forum (SIFF) chuan Arunachal Pradesh-a Siang River chunga 10000 MW dam siam chungchang chu tun hnai khan Nepal khawpui, Kathmandu-a UN South Asia Business & Human Rights Forum hnenah an thlen.
Forum-ah hian SIFF chuan ‘rawtna leh kaihhruaina siama he dam sakin an mite tana chhiatna hrang hrang a thlente sorkar sawipui turin’ an thlen a ni.
Kum 2013-a Arunachal Pradesh sorkarin dam sakna tura inremna a ziah atang khan SIFF hian lungrual takin a dodalna an lo kalpui ngar ngar tawh thin tih an sawi bawk.
“Hemi hnuah hian keiniho hi min bitum a, kan member-ten police leh thuneitute kut an tuar nasa tawh hle,” an ti.
Dam sak hna hi stage II thawh mek niin NHPC hnuaia thawh a ni.
SIFF-in an tar lan dan chuan an member lo neituten an tawrh nasat avanga nasa taka an dodal chungin NHPC hian survey pawh tihluihna nen zanah an ti.
“A hnu kum zelah pawh sipai leh paramilitary force te hmangin min vau bet a ni,” an ti.
An duh lohna hi Arunachal Pradesh chief minister bakah a hun laia Union Water Resources, River Development & Ganga Rejuvenation Minister Uma Bharati leh union minister dang, Gajendra Shekawat hnenah pawh an thlen tawh tih an sawi bawk.
SIFF chuan kum 2014 pawh khan Gauhati High Court hnuaia Itanagar Permanent Bench hnenah PIL an thehlut a, court chuan kum 2022 khan petition thehluttute hamthatna tur hawiin thu a titlu a, ‘nakin zelah chuan dam siam hna thawhin a nghawng theih tual chhung mite nena inrawn leh sawiho zela kalpui turin’ a ti niin an sawi.
High court hian hetiang hian thutlukna siam mah se thuneitute chuan engmah an zawm chuang lo niin SIFF hian an sawi.
“Siang River hi Siang phaikuama chengte nunna hnar a ni a. Adi mipui zawng zawngin kan intawm tlan a ni,” an ti.
“Adi mipuite tan chuan he luipui hi kan thawnthu hluite innghahna leh kan hnam tana pawimawh, hlu leh kan nun kaihruaitu pawh a ni tel,” tiin an thu thehluhah hian an ziak.
“He luipui hrula chengte hian hmun hmingte pawh a hmingchawiin an phuah a, nun dan phung, chanchin hlui, thawnthu hlui, hla hlui leh thil dang tam tak nen he luipui hi a inzawmin a inkungkaih tlat a ni,” an ti.
“Chhum leivak te, dai tlate hi lo neih, thlai khawi leh mihring khawsakna atana tha a ni a; mahse, dam sak tumna hian khaw tam taka mite chu ram nei lovin a siam dawn a ni,” an ti.
SIFF hian dam hi sak puitlin a nih chuan Siang phaikuam hi a tichhe nasa dawn nia sawiin, zangnadawmna eng anga tam pawhin mite nun a chawikang zo dawn chuang lo niin an sawi.
“Khawsak phung hlu tak tak leh mite chanchin hluite chu a tiboral vek dawn a ni,” an ti.
Siang phaikuam hi khawvel huap pawha thil nung cheng tamna a ni a. Hei pawh hi tihchhiat a ni dawn niin an sawi bawk.