Indian eptu hruaitu, Rahul Gandhi chu tun hnaia mi tihhmingchhiat thubuaia thiam loh chantir a nihna leh lung in tang tura hremna chu court sang zawkah ngaihtuah turin a thlen (appeal) ta.
Gujarat-a court chuan Gandhi-a hi kum 2019-a inthlan campaign-naa Prime Minister Narendra Modi-a hming a tihhmingchhiat avangin kum hnih lung in tang turin a hrem a ni.
Congress hruaitu hi MP a nihna atangin paih a ni zui bawk.
Eptu hruaitute chuan rorel lai, BJP-in politics-a phuba lak nan hetiang hian an ti niin an puh a. BJP erawh chuan hei hi phain dan ang thlapin a chungthu rel a nih thu an sawi thung.
India-ah hian nakumah inthlanpui neih a ni dawn a, Gandhi-a hi hremna an pek tihkhawtlai a ni emaw, a thubuaiah thiam chantir emaw a nih loh chuan inthlan hi a chuh thei dawn lo.
Gandhi-a hi Surat khawpuia court-ah a farnu, Priyanka Gandhi Vadra bakah Congress hruaitu lawk tak takten tawiawmin Thawhtanni chawhnu khan a inlan a. Congress worker thahnem tak chu an thlawpzia lantir nan court tualah an pungkhawm bawk a, banner an kenah ‘save democracy’ tih inziak pawh an keng a. Police hotu sang pakhat chuan Surat-ah hian police thahnem tak duty-tir an nih thu ANI news agency hnenah a sawi.
Dan ziahna website, Live Law chuan Gandhi-a hian a thubuai a appeal-naah hian dilna pahnih a thlen niin a tar lang a. Pakhat chu an hremna tihkhawtlai emaw, bail-a chhuah emaw dilna a ni a. Pakhat hi hremna an pek tihkhawtlai a ni thung. Dilna pahnihna zawk hi an pawmsak a nih chuan MP a nihna an hlihsak tawh bawk pek leh a ni dawn tih website hian a tar lang bawk.
Gandhi-a hi March 23-a a chungthu remna tihchhuah a nih rual khan ni 30 chhung bail-a chhuah nghal niin hei hi a appeal-na hun atana tih a ni.
A laka mi tihhmingchhiatna thubuai hi BJP MLA Purnesh Modi-a thehluh a ni a, Gandhi-a’n Karnataka-a an party tana a campaign-naah, “Heng rukru zawng zawngte hian engati nge Modi tih hming vek an puh mai? Nirav Modi, Lalit Modi, Narendra Modi,” tia a sawi chu thubuaiah a thehluh a ni.
Nirav Modi-a hi Indian diamond tycoon niin a tlan bo mek a, Lalit Modi-a hi Indian Premier League chief hlui niin a dam chhung India-a cricket board-a inhnamhnawih tawh lo tura tih a ni.
Purnesh Modi-a’n court-a thubuai a thehluhah hian Gandhi-a thu sawi chuan Modi tih hmingpu zawng zawng a tihmingchhia niin a tar lang a. Hetih lai hian Gandhi-a chuan a thil sawiah hian eirukna a sawi a, tute hnam leh tih bik emaw a nei lo niin a insawi thung.
Congress party chhunga huhang ngah tak, Gandhi-a hi court-in a hremna a puan tuk lawkah parliament-a nihna chu a hloh nghal a. Supreme Court-in a hma daih tawhin dan siamtu zinga miin thiam loh changa kum hnih emaw, a aia tam emaw lung in tang tura hrem chu a nihna hlihsak nghal turin thu a lo rem tawh a ni.
Kar hmasa khan Congress party member-te chuan state tam takah Gandhi chunga hremna lekkawh duh lohna chu an lo lantir tawh a, eptu party dangte pawhin an tawiawm bawk.