Aizawl : Midangte that lohna lai hlir sawi ringawta politics khelh tha a tih loh thu Congress president Lalsawta’n a sawi.
Inrinnia Falkland venga Aizawl South-I Congress Block Conference a hmanpuinaah thu sawiin Lalsawta hian midangte that lohna lai hlir sawi ringawta politics khelh hi tha a tih loh thu sawiin, “Party dang emaw, midang emaw, ka sawichhe hman ngai lo; ram tana kan thil tum hi sawi ila a pawimawh berin ka hria. Mi kan hnial a, kan nek vak vak hian kan hneh chuang lo. Chuvangin, thil sawt lo, tha bawk si loah chuan hun hmang lo ila a tha ka ti,” a ti.
MPCC President hian America ramin British sorkar lak atanga zalenna a sual khan, British chu khawvela ram chak ber, sipai nei tha ber, ram awp zau ber ni mah se, ram hmangaihna tak tak nena an beih avangin a hun laia ram chak ber British kha an hneh thei a. Chutiang bawkin Mizoram hi ram hmangaihna tak tak nena enkawl a, mahni chhiat phah rak khawpa beih a nih phawt chuan Mizoram hi siamthat theih a nih thu a sawi.
MPCC President hian Mizorama mi rethei berte, hausa berte, thalai leh mipui zawng zawng tana sorkar tha siam turin Congress hi koh hran an nih thu a sawi a. Mizoram hi siamthat theih a nih chuan Congress Party hi a siamtha thei tur an nih thu sawiin, “Pawisa puk vak vak lo a kan ram sum dinhmun siamthatte hi kan tih tur a ni. Tunah chuan sorkar lo awm leh turte tan pawha harsatna thlen thei khawpin leiba kan ngah tawh. Chhiat lam kan pan zual zel loh nan sorkar lai hi kan hnawl a ngai a ni,” a ti.
NLUP atangin tanpuina cheng nuai khat pek an tiam angin Congress chuan mipui hnenah an pek thu a sawi a. Chhungkaw thenkhatin NLUP chu hlawhtlin pui lo mah se, chhungkaw tam takin an dinchhuahpui a, cheng nuai thum pek tiam tute’n cheng sing hnih sang nga a sem nen hian a inang lo hle a. Chuvangin, mipui nawlpui dinhmun chawisan a, mi retheite dawmkan hi Congress party hna pawimawh ber a nih thu a sawi bawk.