Aizawl: MZP hruaituten an president, Lalnunmawia Pautu hovin nimin khan School Education Minister Lalchhandama Ralte an hmu a, Sainik School-a Mizo zirlai, unaua lutten full scholarship an dawn theihna tura dan dinglai ennawna siam rem ngai siam rem turin an ngen.
MZP hruaitute chuan Sainik School, Chhingchhipah Mizo naupang, lehkha thiam thei tak tak, unaua lutte an awm thu sawiin, chhungkaw khawsa thei taka mite an nih bik loh avang leh unaua full scholarship an dawn theih loh avanga harsatna an tawh mek thu minister chu an hrilh a. Tunah pawh hetianga harsatna nei, zirlai hmakhaw êng tak pakhat chuan zirna chawlhsan tura inlak chhuah a tum mek niin an sawi.
MZP hruaitute chuan “Kan hriat theih chinah state dangah chuan Sainik School-a zirlaite chu chhungkaw khat atangin zirlai pakhat aia tam an awm pawhin scholarship pek vek an ni,” an ti a. Sainik school-a lut zirlaite scholarship pek dan chu ennawna siam rem turin thuneitute an ngen a ni.
Education minister chuan MZP hruaitute chu a theih chinah hmalakpuia a lo bawhzui tur thu lo hrilhin department khawih theih bakah pawh thuneitu sang zawkah a lo thlen tur thu a lo hrilh niin MZP hruaitute chuan an sawi.