Aizawl: Congress Legislature Party (CLP) Leader Zodintluanga Ralte-in Lunglei councillor hmasa ber atana thlan tlin ZPM candidate 11-te chu Lunglei mipui tan hmasawnna thlentu ni turin duhsakna a hlan.
Nimina thuchhuah a siamah Zodintluanga Ralte hian Lunglei khawpuiin LMC a nei thei ta chu a lawmpui thu a sawi a. LMC inthlan hmasa ber neih zawh taka councillor hmasa ber atana thlan tlin ZPM candidate 11-te chu thinlung taka a lawmpui thu sawiin, “Lunglei mipui tana phurrit ni lo va, Lunglei khawpui leh mipui beisei ang ngeia tha taka hna an thawh a, Lunglei khawpui hmasawnna leh mipui tana rorelna dik thlenna kawnga hmahruaitu an nih theih nan duhsakna sang ber ka hlan a ni,” a ti.
LMC inthlan result puana candidate tling zo ta lote pawh tawnhriat hlawkna tha tak nei a, an inpawm thiama hma lam hun tha nei turin duhsakna a hlan bawk a. Mahni political party leh candidate tana rim taka thawktute hlawhtlinna a lawmpui rualin, tun tuma mahni political party leh candidate tana theihtawp chhuaha hlawhtling zo lote rilru hnual mai lo turin a chah bawk.