Aizawl: ZPM chuan Lunglei Municipal Council (LMC) inthlana sorkarna a siam theih avangin Pathian hnenah lawmthu sawi inkhawm neiin ZPM President Lalliansawta leh ZLP Secretary Dr Vanlalthlana ten thu an sawi.
Republic venga an party pisaa inkhawmah ZPM president chuan Pathian leh mipuite zarah hun chhinchhiahtlak leh ropui tak a chang chu lawmawm a tih thu a sawi a. LMC inthlana thahnemngai taka an party tana thawktute chungah lawmthu sawiin, mipuite beiseina tithlawn lo turin LMC councillor thlan tharte leh party mite a chah.
ZPM Legislature Party Secretary Dr Vanlalthlana pawhin LMC inthlana an dinhmun hi anmahni thawhchhuah ni lovin, thawhsaktu a awm vang nia sawiin, “Chapo thei kan ni lo va, inngaitlawm takin hma lam i pan zel ang u. Pathian lam en tlatin kal ila, kan tih ve tur chinah erawh rinawm leh Pathian lawm tlakin thawk zel ila, he ram tana tawngtai chungin hma i la zel ang u. Pathian malsawm tlaka hna kan thawh phawt chuan kan hmahruaitu hian kawng laklawhah min tawpsan lo vang tih i ring tlat ang u,” a ti.
Dr Vanlalthlana hian Congress leh MNF ten ram tan an theih tawk an lo chhuah tawh a, hmasawnna an thlen tawh zawng zawng thlir hian hei aia tha hi a awm thei ang a, dan pawisak lohna awm thinte hi tun aia tha hian tih theih a nih beiseitute kalkhawmin ZPM an siam a, kalphung thar, thang lo thar zel tur tana belhfakawm ni turin an inbuatsaih mek thu a sawi.
Aizawl North II bialtu MLA hian, “Tha famkim bik lo mah ila, kan hmahruaitu hian hna min thawhsak zel a; mi beidawng kalkhawm kan ni lo va, beiseina thar nei kalkhawm kan ni zawk,” tiin, ZPM hian chhuan tur an nei lo va, an chhuan ber chu dikna, rinawmna, Pathian duhzawnga rorelna tundin a nih thu a sawi bawk.