Lunglei Municipal Council (LMC) inthlan hmasa berah ZPM party-in ward awm zawng zawng la fai vekin hnehna an chang.
Ward 11 awmna LMC inthlan hmasa bera vote tlate chu nimin khan Lungleia Saikuti Hall-a counting hall pahnihah chhiar a ni a, postal ballot-a vote tlate chhiar hmasak a nih hnuah EVM-a tlate pawh chawhnu dar 1 vel khan chhiar zawh fel a ni.
ZPM candidate thlan tlinte chu – Ward No. I-ah Lalhruaitluangi Sailo, Pukpui; Ward No. II-ah Lalmuanpuii Renthlei, Serkawn; Ward No. III-ah Lalzuithanga, Bazar Veng; Ward No. IV-ah R. Lalramzauva, Venglai; Ward No. V-ah Zonunmawii, Rahsi Veng; Ward No. VI-ah R. Lalremsiama, Electric Veng; Ward No. VII-ah K. Lalrinawma, Chanmari II; Ward No. VIII-ah Malsawmkimi Khawlhring, Ramthar Veng; Ward No. IX-ah Zorinsanga Hmar, Lunglawn; Ward No. X-ah Judy Lalhriatpuii, Lungmual leh Ward No. XI-ah Vanlalliana Pachuau, Zobawk te an ni.
LMC inthlana inhnehna sang ber chu Ward No. VIII-a ZPM candidate Malsawmkimi Khawlhring-in MNF candidate C Lalrindiki a hnehna, vote 904 a ni a, inhnehna tlem ber chu Ward No. IV-a ZPM candidate R Lalramzauva’n Congress candidate Joseph Lalremngheta vote 109-a a hnehna a ni thung.
ZPM hian vote tla zawng zawng atanga zaa 49.27 an hmu phak a, MNF-in zaa 29.38 hmuin Congress party-in zaa 20.02 an hmu a, BJP vote hmuh zawng zawng 226 niin, NOTA-ah vote 163 a tla bawk.
Inthlan result puan fel a nih hnuah Lunglei District Municipal Election Officer Ramdinliani’n thlan tlin tharte hnenah Certificate of Election a hlan nghal a ni.
Tar lan tawh thin angin LMC inthlan hmasa ber hi March 29 khan neih a ni a, party pathum – MNF, Congress leh ZPM ten ward zawng zawngah candidate an nei vek a, BJP party-in ward pakuaah an nei thung.