Rajasthan Royals chuan Indian Premier League inkhelah Pathianni khan Sunrisers Hyderabad chu run 72 in an hneh.
Royals hi vuak hmasak tir niin an top order batsman te an che tha hle.
India rawlthar beiseiawm Yashasvi Jaiswal leh Jos Buttler te inkawpin bul an tan tha hle a. Run 54 ve ve siamin Jaiswal-a’n ball 37 a mamawh laiin Buttler-a’n ball 22 chiah a hmang.
Royals captain Sanju Samson chuan run 55 siam ve bawkin over 20-ah run 203 an siam a, wicket nga an hloh.
An bowler te pawh che tha viau in Yuzvendra Chahal chuan 4-17 neiin Trent Boult pawhin over li atang 2-21 neiin a thlawp a, Hyderabad hian run 131 bak an siam thei lo.
Inkhel hnuhnung zawkah Royal Challengers Bangalore in wicket 8 in Mumbai Indians an hneh a. Ball 22 an hmang bang.
RCB tan Virat Kohli leh Faf du Plessis te an che na viau a. Kohli-a’n ball 49 atang run 82 out lovin a siam a. Du Plessis-a’n run 73 a siam ve bawk a. Glen Maxwell chuan ball 3 atang run 12 siamin over 16.2-ah an target run 172 an tlin nghal.
Mumbai Indians tana chanchin lawmawm awmchhun chu rawlthar Tilak Varma niin ani hian out lovin run 84 a siam a, run 171 an siam theih chhan pawimawh a ni.