Thawhtanni khan home theatre music system puakah tun hnaia nupui nei thar leh a unaupa an thi a, music system puak ta hi a nupui bialpa hluiin an inneih present atana a pek tih hriat chhuah a ni.
Inneih thil pek an dawn hi plug-a an vuah luh chiahin a puak ta a, mi paliin hliam na tak an tuar bawk.
Chhattisgarh-a Kabirdham district-a thil thleng hi police-in an chhuinaah chuan home theatre hi thi ta nupui bialpa hluiin an inneih present atana a pek niin a chhungah puak thei a lo dah a ni.
A puakah hian an dahna pindan bang leh chung pawh a tichhe vek a. Police chuan mo neitu, kum 22 mi, Hemendra Merawi chuan electric-a a thlunzawma a switch a on chiahin a puak ta niin an sawi.
Police chuan eng emaw puak thei kam niin an ngai a, present petu leh an pekte an en chuan mo bialpa hlui hnen atangin home theatre system hi an dawng tih an hre ta a ni.
Police chuan mo bialpa hlui, Sarju hi an man tawh a. Kabirdham Additional Superintendent of Police Manisha Thakur chuan thu an zawh tawhnaa a sawi dan chuan a bialnu hluiin pasal a nei tur chu a thin a rim hle a, home theatre system chhunga puak thei dahin phuba a la ta niin a insawi tih a sawi.
Merawi-a leh a nupui hi Inrinnia innei chauh kha an ni a. A unaupa, kum 30 mi, Rajkumar a thi ve a; naupang kum khat leh a chanve mi telin mi paliin hliam tuarin Kawradha-a district hospital-ah enkawl an ni.