Aizawl : Lengteng bialtu MLA Dr L. Thangmawia’n a MLA fund Rs. nuai 2 leh MGNREGS atanga Rs. nuai 28 hmanga a bial Ngopa khua, Hmunnghak rama Mizorama a hmasaber tur Biomass briquettes siam chhuahna tur buatsaih mek chu nimin khan tlawhin a enfiah. He hmun hi tun thla tawp lama hawn hman beisei a ni.
L Thangmawia chuan a bial chhunga thil chhinchhiahtlak tur, Mizoram tana thil tangkai tur leh a hlawhtlinna hmuh huna Mizoram hmundanga an la entawn ngei tur hmalakna a awm chu lawmawm a tih thu a sawi a. Sum ngaihtuahsaktu Rural Development department leh a changtu Minister Lalruatkima te lawmthu hrilhin, he hmalaknaa tha thawh mek leh tha la thawh tur te pawh Mizoram tana ngaihtuahna senga, he hmalakna hi a hlawhtlin chhoh zelna tura tan la zel turin a chah bawk.
Ngopa-a Biomass briquettes siam chhuahna tur buatsaih mek chu a taka kalpui a nih hunah chuan faina leh thianghlimna atan leh environment humhimna atan te a tha hle dawn niin sorkar thuchhuahin a tarlang a. Meihawl atan leh thlasika meilum ai atan pawh a tangkai hle dawn niin a tarlang bawk a ni.