DFB Pokal a champion tura rinkai Bayern Munich chu an chesual a, huntawp dawnah penalty chawiin SC Freiburg in 2-1 in an hneh theih phah.
Thawhlehni zanah Allianz Arena-ah DFB Pokal quarter-final hi khelh a ni a. Second half tawp dawna hun pek belhah Lucas Hoeler chuan an penalty hmuh chu Yann Sommer-a dive lohna lamah a pet goal.
Coach thar Thomas Tuchel hnuaia an inkhelh vawi hnihnaah Bayern Munich in minute 19-naah hma an hruai a. Joshua Kimmich corner pet chu Dayot Upamecano chuan a tauh lut.
Freiburg an huai a, goal nawr tumin an khel ngam. A huaisenna rah sengin metre 20 a hla atangin minute 27-naah Nicolas Hoefler chuan an si phurh a sut.
Bayern hian Freiburg keeper Mark Flekken tan hna siamsak thei reng mahse Eric-Maxim Choupo-Moting, Thomas Muller leh Leroy Sane ten goal khungna remchang an neih atang an khung lo vek a. Huntawp dawnah penalty chawiin an chesual ta zawk a ni.
Freiburg coach Christian Streich chuan, “Kan result avangin ka lawm hle. Vanneihna kan lama a tan a ngai a, mahse kan thawkrim hrim hrim. Kan goal ven danah inpekna a sang hle.” a ti a.
Bayern coach Tuchel chuan, “Kan thin a ur hran lo. Goal hnih an khungte kha chance tha an neih chhun vawi hnih atangin a ni. Kan inkhelah a hmawr kan bawk dante leh tihsual zeuh kan nei leh thin, hengte hi kan inzir zel a ngaihna a ni.” tiin a sawi.
Inkhel dangah striker ngaihven hlawh Randal Kolo Muani chuan goal hnih khungin Eintracht Frankfurt pawhin 2-0 a Union Berlin hnehin quarter-final an lut.