Rapper lar tak, lar vanglaia kahhlum Tupac Shakur leh Donald Trump khaikhin a ni ta chu rapper farnu a tithinrimpha tlat mai.
Trump-a attorney Alina Habba chuan thubuai lian tak takin a luhchilh mek Trump chu Tupac Shakur leh Notorious B.I.G te nen khaikhinin, thubuai rip tak an hmachhawn hian an larna leh hmingthanna nasa takin a vawrh lehzual a, jail bang an zut hnu lamah pawh tunhma zawng aiin an lar zual zawk emaw tih mai tur a ni, a ti.
“Donald Trump hi Tupac a ni. Ama pual liau liaua brand pui tak nei thei a ni a, engkim mai hi a tithei a ni. Thubuai siamsak a ni hian a larna leh hmingthanna a tizual zawk hlauh dawn a, polls-ah te pawh chiang takin kan hmu chho mek zel. Hei hi zawh buai chi pawh a ni lova, thudik chiang tak awmsa a ni,” tiin host Benny Johnson hnenah a sawi.
Heti anga khaikhin a, hming hmera lamchhuah a ni chu Shakur-a farnu Set Sakhur a lawm lo hle a, lawyer tawng duh ve tak chu na taka bei zuin, a unaupa larna chhan chu buaina hrang hrang a tawh vang lam ni lovin, a music ropuina leh thiltheihna vangi liau liau, a ti ve thung.
“Ka unaupa hi a dinna, a thurin leh inghahna atanga teh mai tur a ni a, mimal ang pawha mawhphurhna la ngam a ni,” a ti bawk.
Heng mite pahnih khaikhin chi an ni reng reng lova, 1994 daih tawh khan Tupac hian sexual abuse chungchanga thubuai a nei a, inpha kual lovin, a pawm hmiah ngam laiin, US President hlui erawh heti anga mizia pu ngam leh huaisen nia a ngaih ve lo thuin a umzui nghal.