Taxation department-in kum liam ta, 2022-2023 chhung khan chhiah chi hrang hrang atangin Rs vaibelchhe 1,020.66 an hmu a, hmuh tura ruahman zat chu Rs vaibelchhe 120-in an khum.
Commissioner of State Tax R Zosiamliana’n The Zozam Times a hrilh danin, sorkarin kum tin taxation department-in chhiah a lakkhawm zat tur a bituk thin a, 2022-2023 kumtira an target chu Rs vaibelchhe 730 a ni, a hnu kum chanve hnuah target chu tipungin Rs. vaibelchhe 900-ah tihsan a ni leh.
Taxation department hian 2022-2023 chhung khan chhiah chi hrang hrang atangin Rs 10,20,66,22,746 an hmuchhuak a, sorkarin hmu tura a beisei, Rs vaibelchhe 900 chu Rs. vaibelchhe 120-in an khum a ni.
2022-2023 chhunga chhiah an hmuh tamna ber chu Goods & Services Tax niin Rs 8,91,33,10,807 an hmu a, Sales tax/VAT Rs 1,13,61,31,712, profession tax Rs 15,67,81,158, entertainment tax Rs 1,16,876 leh Registration & License fee atangin Rs. 2,82,193 an hmu.
Commissioner of State Tax R Zosiamliana chuan 2022-23 chhunga an target, Rs vaibelchhe 120 laia an khum thei chu an lawm hle tih a sawi a, thawktute thawhrim rah a nih thu a sawi.
Chhiah hmu tha tura kawng hrang hranga hma an lak thu sawiin, “Investigation wing-te kan din a, chuta tang chuan tax return file lote chhui chhuakin reminder-te kan pe a, hei bakah TDS atanga chhiah pete pawh chhuiin chhiah pe tha turin kan hrilh hre thin,” a ti.
Taxation department hian kumtin chhiah an hmuh tur zata ruahman an khum fova, 2021-2022 khan an target Rs vaibelchhe 717.13 a nih laiin Rs vaibelchhe 894.74 an hmu a, an target chu Rs vaibelchhe 177.71 in, an lo khum tawh a ni.