Aizawl: New Delhi-a cham mek, District Council & Minority Affairs Minister Robert Romawia Royte chuan Ningani khan Union Minority Affairs Minister Zubin Irani a pisaah kawmin PMJVK Guidelines siam thaa Mizoram pum a scheme-in a tuam thei tawh tur chu lawmawm a tih thu a hrilh a. Hun rei tak Mizoram district pariatte chuan PMJVK hnuaia hamthatna an dawn theih loh avangin hengte cover tura Mizoram sorkarin project a siamte chu ngai pawimawh turin a ngen.
DC&MA minister chuan kum kal taa PMJVK sanction thar awm lo chu pawi a tih thu sawiin, India ram state hrang hrangte ang thovin Mizoram tan pawh thil hrilhhaithlak tak a ni tiin Mizoram chuan sum dawnsa tluang taka a hman theih avang leh a taka projects thawh zawh chin a san tawh avangin a bika ngaihtuah a phu a ni a ti.
Minority Affairs Minister Robert Romawia Royte chuan Mizoram sorkarin PMJVK scheme chu tha taka a kalpui thu leh 2nd instalment sanction vat a ngaih thu a sawi a. Sanction hmuh tirh lama Covid avanga hna tan muan deuh awm mah se tunah chuan hnathawh a kaltluang a, project tam tak zawh tawh niin zawh mai tur tam tak a awm thu a sawi bawk.
DC&MA changtu Minister chuan district council area tan a bika project an siam thu sawiin, sanction a nih vat theih nan a tanpuina a dil bawk a, Union Minister Irani pawhin theihtawp chhuahpui a tum thu a lo hrilh a ni.
Robert Romawia Royte hian Nilaini zan khan Union Minister of State for DoNER BL Verma pawh a chenna inah kawmin Mizorama 6th Schedule area tana a bika ruahmanna siam tul a tih thu sawiin a rawtnate a sawipui a ni.
Hemi ni vek khan Union Minority Affairs State Minister John Barla chu a chenna inah kawmin Mizoram mamawh hrang hrangte a sawipui bawk.
Nilaini chhun khan Robert Romawia Royte leh C.Lalrosanga, MP te chuan Union Finance Secretary TV Somanathan pawh kawmin finance ministry-in a puih thinnaah lawmthu hrilhin Mizoramin a bika ngaihtuah a ngaihna lai leh a chhante an sawipui a. finance secretary pawhin an thu thlente chu a bika ngaihtuahpui a tum thu a lo hrilh a ni.
Sports Minister Alex V.Chawngthu, Addl. Resident Commissioner, New Delhi, Mizoram House-in a tawiawm a ni.