April 6 kha BJP party din champha a ni a. India ram chhung hmun hrang hrangah lawm a nih rualin Mizoramah pawh district hrang hrangah lawm a ni.
BJP Mizoram Headquarters chuan Ningani zing dar 9:30-ah an president, Vanlalhmuaka chuan BJP puanzar a pawt pharh hnuah Prime Minister Narendra Modi thusawi an ngaithla a, hemi hnu hian Aizawl khawpuiah two wheeler rally an nei leh a ni.
Chawhnuah an party pisa, Mipui Rûnah lawmna inkhawm nei lehin he hunah state president chuan ram chhunga BJP-in thuneihna changa an sorkar atangin khawvela ram hmasawn ber a ni thei a. Hetih laia zirtirna dik lo avanga Mizoramah BJP nih a zahthlak thu leh Kristiante tana inhmeh lo anga ngai an la awm chu pawi a tih thu sawiin, “Party dangin sorkar leh nan hun tha an nei tawh dawn lo a ni tih an hriat avangin, thu dik lo hmangin mipui thinlungah an kuai her ta a ni,” a ti.
Vanlalhmuaka hian Mizoram hi Kristian sakhuaah a rinawm loh avangin ramin nasa takin a tuar a. Mizorama sorkar tawh leh sorkar mekte hian kohhran mi intite vek an ni chunga ei rukna nasa lutukte hian chanchin tha hrilh hi engmah lovah a chantir fo niin a sawi bawk.
BJP din champha vawi 43-na lawmna pual hian district hrang hrang – Siaha, Lunglei, Mamit leh Serchhip-ah inkhawm buatsaih a nih bakah two wheeler rally an nei a ni.