RB Leipzig in DFB Pokal-ah semi-final lut turin team lian an hneh a. Borussia Dortmund lakah 2-0 a chakin an champion trophy chawi nawn tumin hmalam an pan.
Nilaini zana Red Bull Arena a inkhelah Leizpig in hnehna an chan avang hian inelna hrang hrangah a zawna match thum an tlawm tawhna chu an titawp.
Leipzig hian tunhnaia an chetchhiat hi an tuar a, league lamah panganaah tlak thlak phah tawhin hei vang hian result tha neih a insiamthat ngei an tum.
An football khelhah pawh langin inkhel tan atangin an tlam hnem a. Dortmund player-te tan ball kawl rei theihna hun siam lovin an bawr hneh. Ball an chanin an muangchang lova, goal khungna remchang an insiam nual thei.
Mikhual team hi kartawp a Bayern Munich laka tlawm hlim an ni ve bawk a. Leipzig nawrna dang thei lovin minute 22-naah goal an chhuah.
Leipzig tan striker Timo Werner chu ‘team goal’ mawi an khungah a hmawr bawktu ah a tang.
Second half tan tir lamah Dortmund an insiksawi a, inkhelah langsar deuh mahse an thlak danglam thei lo.
Huntawp dawn tawhah Willi Orban chuan Leipzig chakna goal a khung ta zawk a ni.
Leipzig coach Marco Rose chuan, “Tunhnaia kan result chhia kalsan turin tumna tha tak kan lantir a, insiamthat duhna lian tak kan lantir. Hnehna chan dan pawh kan hria tih a lang.”
“He result hian nghawng tha a neih ngei ka beisei a. A zawna vawi thum tlawm hi chuan inrintawkna hloh te hi a awl a, chetthat lehnghal mai a har thin.” tiin a sawi.