- Lallunghnema, Charity Lodge
Consumer Huang chhiartute chibai ka buk a che u.
He consumer khawvel ram zau takah hian Mizoram hi zim te a ni a. Mihring pawh kan la tlemin kan la thawl hle a. Chutih a nak a laiin fa neih tlem kan la intihhmuh nge maw ni, fa pahnih, pathumah hian kan duh tawk ta deuh zel mai.
Mihring pun tlem hi a pawi thei tih an hriatin Sawrkar leh Kohhrante an mangang ta a ni.Fa neih tam kan inzirtir tlai khaw hnu a.Fa nei thei tawh lo tura insiam(tubectomy)lawmman sawrkarin a pek hun lai kha a la rei lo khawp mai!
Han ti ve khanglang ila, kan naupan lai a unau sawm chuang awm thin ang kha tunah chuan hmuh tur an awm ta meuh lo. Hei vang hian mihring kan pung chak lo hle a ni. Kan ramah hian mihring nuai sawm pahnih awrh kan la awm a, Mizo hlang phei chu nuai riat vel chauh kan ni mai thei.
Hetih mek lai hian kan la inngeih lo ta dah a! Hnam ropui tak chu kan ni lo khawp rih mai. Chutih mek laiin Consumer Awareness lamah hian kan la hniam em em si a! A pawi em em a ni ringawt. Thil lei leh hmanna a lung awi lo,ngawi liam ta mai mai kan va tam em!
Hmanni lawk khan Pastor pakhat,ka laina hnai lutuk tak mai nen chhungkaw chawhlui kilhonaah ram mipui thil kan sawi dun a. Kan hlawkpui em phei chu ka hre lo.. Pastor fel tak e ti lovin consumer right leh a kaih hnawih aw thil hi a han hre lo ve ang reng khawp a! A tawp ah chuan kan nui tawp!
Hetiang hian kan ti ti a ….
Pastor :Rorelna dik chungchangah hian Consumer thil hi chu a nep deuh alawm!
Keimah : E khai a! Consumer thil hi Politics dik tak a ni ve asin. Consumer thil hriat loh hi nangni tan phei chuan a zah thlak zawk a ni!
Pastor : Rorelna dik hi a pawimawh ber alawm! Roreltu dikah chuan consumer thil chu a lo lang mai ang chu.
Keimah : Rorelna dik nei tur chuan Consumer right hriat a ngai a lawm. Mi fing leh fel pui pui hian Consumer Right in hre tlat lo hi chu a zahthlak ka ti deuh a ni.
Pastor : Consumer Right hriat hi chu a tha kawp mai.
Keimah : A tha satliah lova, Consumer Right hriat hi tih makmawh a ni zawk.
Pastor : Lo ti tang tang rawh. Rorelna dik dinna a nih chu!
Keimah : Ni e, kei hi chuan Political Party – te ai chuan Consumer thil hi ka dah lian hmasa tawh. Party Politics ah hian beiseina ka nei sang lo!
Ti hian kan bei zel ang. Mipui zingah an dikna leh chanvo sual chhuah tum an pung zel. Harsatna nei te kan tanpui zel ang. Sum awt lo, sum ngaina lo mi dik Pathianin a duh a ni.
Pastor : A dik a lawm! Tunah rih chuan Mizoram hian rorelna dik hi kan mamawh ber a ni. Mahse kan la hmu lo, MLA leh Minister nih thlahlel ka ngaina lo, hruaitu dik a pawmawh ber.
Keimah : Keini chuan mipui hian an dikna leh chanvo hmu se kan duh a. Chumi atan chuan kan bei mek a ni.
JERC an tih hi i hria em? Electric Tariff bituk thintu, thuneitu hi maw le .
Pastor : Hre lo, ka lo hre ngai lo, eng nge chu chu a awmzia?
Keimah : A va mak ve! JERC chu Joint Electricity Regulatory Commission tihna a ni a, Joint tih hi Mizoram leh Manipur inkawp tihna mai a ni e. Mizoram hian a hranpain Commission kan la neih ka beisei.State dang zawng zawngin Commission an nei deuh vek tawh a ni.
Pastor : JERC chuan enge an thawh ber?
Keimah : JERC for Mizoram and Manipur chuan Khatla kawn chhak deuh kawngpui bulah Office an nei a. TBL Building saw an luah mek a ni.
Tunah sawn an Chairperson chu Er L Pachuau a ni a, member ni mek chu Pu R Thanga a ni. (Pu R Thanga hi Manipur aiawh a ni). Chief Engineer Er H Thantluanga niin Pu Richard-a chu Secretary a ni a. Anni ho hian JERC hi an awp khawm a ni. Manipur kawlphetha chhit man bituk tu an ni bawk . Kumtin April thla thar ve leh a, hman turin March thla chhungin ruahmanna an siam vek thin a ni. Mizoram a kawlphetha Tariff bituk bakah power lama hmasawnna tura thapui thawhtu an nih ber chu.
Pastor : SAC i sawi kha engnge ni?
Keimah : SAC chu a lam pum chuan State Advisory Committee tihna mai a ni. A pawimawh hle JERC hnuaiah awmin member pawh hi mi thiam pui pui an ni.
Pastor : A ni maw!!Ka lo hre lo hle mai!
Keimah : SAC hi JERC hnuk an ni, NGO aiawh pakhat leh Prominent Citizen an ni. Official (P&E) te an tel bawk,. Kawlphetha tha tak leh changtlung, hmasawnna dik leh tha an ngaihtuah, Tariff pawh an ngaihtuah tel bawk.
Pastor : Member i ni ve a?
Keimah : Ni ve e, Consumer Activist ka nihna leh pawl pakhat hruaitu ka nihnain ruat ka ni.
Pastor : A bengvarthlak hle mai
Keimah : A nih leh Electric bill a an sawi thin Contracted load an tihte, Connected load an tihte hi i lo hre ve ngai em?
Pastor : Ka hre ngai reng reng lo!
Keimah : Ka hre ngai lo ! A mak thin mange aw!Ka la zirtir ang che u. Tunah chuan hun leh hmun a chep em mai!
I nitin nunkhua a bet tlat, Power bill etc-te i hriat loh chuan ,”Rorelna dik a awm thei lovang”,tiin laklawh takin kan inthen ta a ni.Ka sawi leh dawn eng ang mi pawh ni ila, Consumer Right hriat hi chu kan mawhphurhna a ni.
Tunah chuan phek dang kan keu dawn tawh e….. Mobile phone leitu leh mobile phone zuartu inkar thu hi ka han chhawp chhuak leh dawn a ni.In hriat lih ka duh love!
Consumer thil hi, ka buaipui ber thin a nih avangin kan hlawhtlinna thenkhatte hi ka rawn pho chhuak leh dawn a ni. Intihtheihna leh intihlar duhna vang ni lovin, mipui hian kan dikna leh chanvo kan hloh zel loh nan kan han tarlang mai a ni e.
Kan at vangte, kan dawih vangte, kan mawl vangte hian thil tha kan chan nasa em em a ni. Kan chan tawh loh nan leh kan hloh tawh loh nan kan inzirtir a ni. Kan lo nihlawh zawk nan mi huaisen chanchin hi kan sawi leh dawn a nih hi.
Saihaah sawn kan pu fapa a awm a. Kan Pu kha First class Contractor a ni thin a. Tunah chuan kan Pu hian Chatuan Ram min pansan tawh a.Ka Pu fapa Elisian-a hian(a hming ka han lam chhuak ta ngawt mai a.Min lo hre thiam se-llh)tum khat chu mobile phone dawr pakhat atangin mobile phone changkang pangngai tak hi a lei ve a. Mahse harsatna a tawk ta tlat mai! A message ka hmuh thenkhat ka han zep zauh phawt teh ang,….thla li chiah ka hmang hman a, Dec 10-ah a thi ringawt a, ka leina dawrah ka kalpui a, Service Centre a min thawn sak tur anga in sawiin ka phone chu an lo la a. Mahse thla 6 a liam hnu pawh chuan chhuan lam hrang hrang siamin “a part a la awm lo, a part an lo thawn nen a inmil lo”, tiin min lo hren khawtlai sak zel a….. Tin ka phone hi kum khat chuang lai min kawlsak tawh avangin tunah phei chuan warranty period a zo tawh a. Chuvangin ka pu, khawngaihin ka harsatna tawhah hian phone thar a min replace sak emaw, full refund ka nih theih nan hma min laksak hram turin i khawngaihna ka rawn ngen e… tiin.
Tichuan le, mobile phone zuartute ka va call ve nghal vat a… Fimkhur mangkhengin ka va biaksak leh rawih, a tawi zawngin ka han sawi anga..
.. Phone call a lo kal..
Seller: Ka pu, hmanni a mi kha i ni em?
Keimah : Ni e, engnge ni ta?
Seller : Mobile phone chu a thar kan lo pe ang nge, lo kal se.
Keimah : A that nasat chu, ka lo hrilh ang nge.
Ka thu dawn hnuhnung thenkhat…
“Ka Pu Hnem, tuna ka phone chungchangah pawh hian “Zan tam tak ka mut theih loh phah bakah stress ka neih phah a, ka hriselna a chhiat phah”, ti ta ila, zangnadawmna ka chawi tir ve thei tho lo maw”,?
Ka chhanna : “Chutiangin nang leh kei hian tumah kan chawitir thei lo.Thuneitu kan ni lo.Thurawn petu erawh kan ni thei.Kan tih theih chu Consumer Court pan a ni”!.
Ka thu hmuh hnuhnung ber ,” Ka Pu Hnem,hei ka phone kha kan in be rem tawh a, pawisa min pe tawh e. Ka leina senso zat Rs22000 min pe let. Nangma zarah liau liau a ni e. Ka lawm lutuk ringawt.”
A tawp ta! Ka ziak hman tawh lo!
Chawlhkar lehah kan titi ho leh dawn nia.
I thil leiah fimkhur rawh,
Bumin awm fo suh.