Set an hloh hmasak hnuah Chhinga Veng Spikers-in an mamawh set thum la zawnin a mawngah nghet leh zualin Thutak Nunpuitu Team (TNT) an beng bet a, Mizoram Rural Bank Pro Volleyball League kal mekah Nilaini zan khan a vawi khat nan an chak.
Kum khat an awl hnuah kum 2019 champion Chhinga Veng kir lehin an khelh hmasak berah chak theihna hun tha an bawhpelh nasa a. Sihphir lakah set la hmasa zawk ni chungin vawi hnih hma an hruai a, set nganaah 10-7-a sang zawk an nih leh hnuah an inpawhtlaktir a. Boruak chhiain um zuiin TNT hmaah thatho lo leh inman lo takin set khatna an hmang tluan a, setter C Zonunmawia thlakin H Lalruatsanga’n a tawp thleng a khel.
Set hnihna atangin an inchawk phur a, inring tawn chungin inkhairual zawkin an khel zui thei a, a tawp thlengin TNT an dang hneh a. An khelh hmasak aiin mi malin Chhinga Veng player-ten hma an sawn a, team pum pui chawi kangin league kal meka vawi hnih an khelh tawhah point li an hmu a, semi-final lut thei palinaah an insawn chho.
Spikers tan lehlam vuak dangtu leh rang taka ball vaw tla thin, Vanlaltanpuia’n point 15 hmuin point hnih chiah a paih a, Kuriz Player of the Match-a thlan a ni a. Cuban player Morales Ponce De Leon chuan tum 22 vaw tlain point 13 a hloh a, Sihphir nen an inkhelh tuma a point hmuh zat chiah ni mah se TNT hmaah a tisual tlem zawk a. Captain Lalchungnunga’n point 14 a hmuh chanve a hloh tel a, H Malsawmsanga leh R Vanlalmawia ten point 10 chuang ve ve an hlawh chhuak bawk.
TNT player tam zawkin inelna sangah tawn hriat an tla chham a, set hmasa berah nung takin khel mah se set hnihna atangin ball vuak tlak an harsat a, an theihna a san tawk loh avangin bei ngial mah se tawp chin an nei.
An khel rei tial tial a, hniam lam panin an inthlau telh telh a, set hnih an hloh zawn hnuah awmze neiin an bei let thei tawh lo va, set linaah point 10 chiah an hmu ve hman a ni.
- MIZORAM RURAL BANK PRO VOLLEYBALL LEAGUE 2026
May 11 – June 13, 2026 @ LPS Arena, Falkland, Aizawl
RESULT (Round 3) – May 20, 2026 (Nilaini)
Chhinga Veng Spikers def Thutak Nunpuitu Team (Mipa)
19-25, 25-21, 25-20, 25-10 (3-1)
Kuriz Player of the Match – Vanlaltanpuia (Chhinga Veng Spikers)
Cheetak Fan of the Night – Saithangpuia (TNT)
MVA Lucky Fan – Vanlalhruaii (TNT) & Linda Lalnunthangi (TNT)