India ramah kum 2022 khan sakei 3,167 a awm mek a, hei hi sakei chhiarpui neih hnuhnung bera a dinhmun a nih thu Prime Minister Narendra Modi chuan Pathianni khan a sawi.
Chhinchhiahnaah chuan sakei hi kum 2016 khan 1,411 an awm a, 2010-ah 1,706, 2014-ah 2,226, 2018-ah 2,967 leh 2022-ah 3,167 an awm.
Prime minister hian ‘Project Tiger’ kalpui tanin kum 50 a tlinna a hawng a, hemi rual hian ‘International Big Cat Alliance’ pawh hawngin hei hi sapui chi sarih humna leh enkawlna tur niin heng zingah hian sakei leh sakeibaknei pawh a tel.
Kum 25 lo awm leh tur chhunga sakei humhalhna tura hmathlir tar lanna booklet, ‘Amrit Kaal Ka Tiger Vision’ a tlangzarh bawk.
Modi-a hian Pathianni khan Karnataka-a sakei humhalhna hmun pawh a tlawh a, lirtheiin km 20 zet fang kualin sakeite a thlir kual bawk a ni.
India hian a ram chhunga sakei chi hrang hrang awmte tihpun leh awmtir thar leh tumin hma a la nasa hle a. Tun hnaiah Namibia leh South Africa atangin cheetah pawh la lutin no nei pawh a awm leh tawh a ni.