Mi pawngsualtu leh thattu, South Africa-a a tanna ina thi tawh anga inlantira tlanchhuak ta chu Tanzania-ah man a ni.
Thabo Bester-a hi a tanna inah in hal hlum anga langin a tlan chhuak a, hemi hnuah hian nasa taka zawn zui a ni.
Thla hmasa khan post-mortem tih thar lehnaah a pindana ruang an hmuh kha amah a ni lo tih finfiah niin zawn zui tan a ni.
Zirtawpni khan a bialnu leh rinhlelh dang pakhat nen man an ni a, South Africa-ah hruai an ni dawn.
Police chuan an pathum hian an manna thenawm, Kenya pan zel an tum niin an hria.
Bester hi social networking site hmanga a beih turte a kawm nel hmasak thin avangin ‘Facebook rapist’ tia sawi mai thin a ni.
Kum 2012 khan a bialnu, model Nomfundo chu pawngsuala thatah puhin thiam loh chantir a ni a. A hma kumah hmeichhe pahnih pawngsual leh rawk thubuaiah thiam loh chantir a ni bawk.
Nikum May khan Bloemfontein khawpuia a tanna, Mangaung Correctional Centre-a a pindanah inhal hlum anga hmuh a ni.
Nikum kumtawp lam atang khan tual chhung chanchinbute chuan Bester-a thih rinhlelhna hi an tar lang tan.
March thla khan police-in chhui thar lehin ruang an hmuh kha Bester-a a ni lo tih an finfiah ta a, na taka a lua kutthlakna tuar lova thi niin an hre ta zawk a ni.
British hnuaia security company, tan in enkawltu, G4S-a thawkte chu Bester-a a tlanchhuah theih nana puitua puh an ni zui a. Pathum chu bân an ni.
Kum liam ta chhungin Bester-a chungchang hi chanchinbuah lang zauh zauhvin thenkhat chuan Johannesburg daia eichawp dawra a kal lai an hmuh thu te, mansion-a a chen thu te pawh an sawi.
Khawvela mipat hmeichhiatna thila pawikhawihna tamna ram, South Africa-a Bester-a a tlanchhuak hian mi tam tak a tithinrim hle a ni.