United States President Joe Biden chuan, “Silai hmanga buaina siam hi kan ram hri leng tha lo ber a ni a, ram dang lakah pawh a zahthlak hle,” tiin Ningani khan a sawi.
Inkhuahkhirhna thar hi Congress pawmpuina kher hmang lovin executive order hmangin a tichhuak.
He danah hian silai thenkhat khuahkhirhna te, a neituten dan ang thlapa nei an nih leh nih loh chhui chianna tur leh tual chhung buaina tihrehna atana pawimawh tak takte a tel.
US danpuiah Second Amendment-in mi malin a sahimna atana silai kawl a phalsak avangin president hian a kalpui theih a rinawm loh.
Biden chuan Ningania White House Rose Garden-a thu a sawinaah hian, “He ramah hian ni tin mi 315 silaia kah an ni a, mi 106 thi ziah ang an ni,” a ti a. “Hri tha lo tak a ni a, tihreh a ngai,” a ti.
Executive order a siam hmang hian Justice Department chu ni 30 chhunga tualchher silai ‘ghost gun’ hman phal lohna dan duang turin a hriattir a. Heng silaite hian serial number an neih ve loh vangin a chhui theih loh.
Mi thiamte chuan heng silaite hi pawikhawihna atan a hluar mek niin an sawi a. Los Angeles-a silai an man zawng zawng 40% chu hetiang hi a ni.
Silai khuahkhirh a nih tur thu a puan hnu reilo tea Texas-ah inkahnaah mi pakhat a thi a, panga an hliam.
Hliam zinga palite chu an na hle niin police-ten an puang.
Pawikhawihna hmun hi Bryan, Texas-a cabinet siamna hmun a ni a. Kent Moore Cabinets-a thawk, Larry Bollin, kum 27 mi chu pawikhawihtua rinhlelh a nih vangin police-ten an man nghal.