Aizawl: Mizoram Pradesh Youth Congress Committee (MPYCC) chuan Zokhawsang leh a chhehvela lo neitute harsatna tawh chungchang Assam Rifles hotute an sawipui.
MPYCC President Dr Lalmalsawma Nghaka hoin Inrinni khan an hruaituten Assam Rifles Hqrs. Mizoram Range Khatla, Aizawl-a Assam Rifle hotute an kawm a. Zokhawsang leh a chhehvel ram – Sedaikawn, Ramthazawl, Khuangkhaului, Phivawklui, Lallozawl, Changelzawl, Aharram, Sangabawk leh Bulpui zau-a loneitute’n hun rei tak atang khan feh kawng atan Zokhawsang ram an hman thin chu tun hnaiah Assam Rifles Lakhimpur Battalion ten an awmna tura an cheibawl tak avangin feh kawng hi hman chhunzawm theih tak loh avangin lo neitute harsatna an tawk mek chungchang an thlen a ni.
Assam Rifles hotu pawhin tun lai hi lo hal zawk, thlai chi thlak lai, loneitute tana hun pawimawh a nih avangin thla hnih chhung vel chu ruahmanna an lo siam tur thu MPYCC hruaitute an lo hrilh a ni.
Congress Thalai hruaitute chuan Assam Rifles thuneitute lo neitute tana hun remchang an siamsak tur chu lawmawm an tih thu an sawi a. Hetih lai hian, Zokhawsang chu Battalion pakhat hmun tur anih avangin hunrei tak erawh an camp paltlang hi remtih a nih dawn loh avangin, Mizoram sorkar chu lo neituten harsatna an tawh chhunzawm loh nan ruahmanna a rang thei ang bera siam turin an ngen a. A tul hun apiangah MPYCC chuan Zemabawk leh Zokhawsang chhehvela loneitute thlavang hi hauhin hma an la zel dawn niin an sawi bawk.
Assam Rifles Hqrs Mizoram Range DIG Brig. Girish Upadhya chu a zin bo avangin 2nd-in-Command/GSO1 Maj. Amit Yadav chuan MPYCC te hi a lo dawngsawng a ni.