Aizawl: Khawvel chhandam nana Isua Krista khenbeh a nih hnu a a thawh leh ni, ‘Easter’ chu nimin khan khawvel hmun dangte ang bawkin Mizoramah urhsun leh hlim taka hman a ni.
Zing takah Salvation Army band party-ten Aizawl khawpui hmun hrang hrangah ‘A tho ta’ tih hla rimawi an rem.
Kohhran tam ber chuan ni chhuah rualin biak inah leh biak in tualah inkhawm an buatsaih a, thingpui inin Easter artuite an ei a. Chawhma leh chawhnu inkhawm pawh Krista thawhlehna ni puala buatsaihin thawhlehna lam thupuiin hmanga Pathian thu sawi a ni.
Presbyterian Kohhranten chawhma inkhawmah ‘A sawi ang ngeiin a thawh leh tawh kha’ tih thupui hmangin thusawituten thu an sawi a. Chawhnu inkhawmah ‘Isua thawhleh angin kan tho leh ang’ tih thupui hman a ni a. Zan inkhawmah ‘Thawh lehna nun tawmpuitute nun dan tur’ tih thupui hmangin thuchah ngaihthlak a ni.
Chawhma inkhawmah Easter pualin thingpui ruai an theh a ni a. Catholic kohhrante chuan Thawhlehna ni ruai an theh hlawm.
Easter hi district hrang hrangah kohhran hrang hrangin an lawm bawk a. Serchhip khawpui leh a chhehvel kohhran hrang hrangten urhsun leh hlim takin an hmang a. Salvation Army brass band chuan Bazar kawnah zingah thawhlehna thu rimawi hmangin an puang a.
Catholic chuan Assumption Church P&E vengah easter lawmna inkhawm branch thum infinkhawmin hman a ni a, inkhawm banah sawhchiar leh artui sem a ni a, zanah P&E bazar atangin easter lawmna bati kawngzawh neih a ni.
Kolasib-ah chuan zing ni chhuah hma atangin thalai rual thenkhat chuan Isua chu lalber a nih thu puangin khawlai fangin an au rual a, Salvation Army Corps brass band thenkhatin rimawi tumin thlan ata Isua a thawhleh thu an puang bawk.
Kolasib-a Catholic kohhran, St. Joseph’s The Workers Church-a lawite chuan tlaiah Easter Sunday pualin ruai an theh a, kohhran tam zawk chuan chawhma inkhawm bânah thingpui ruai an kil.
Lawngtlai district-a kohhran hrang hrangte pawhin Easter hi urhsun leh hlim takin an lawm. Inkhawmah Isua Krista thawhlehna leh chumi vanga mihringten chatuan nunna an neihna lam hawi thusawi tura ruatten an sawi a, inkhawm banah a bika artui chei mawi leh ei tur chi hrang hrang nen thingpui ruai an kilho va, Pathian faka zaikhawm kohhran engemawzat an awm bawk.
Lawngtlaia hmunpui nei, Lairam Isua Krista Baptist Kohhran pawhin Easter Sunday hi hlim takin an hmang a, LIKBK Assembly atangin thupui thlan bik an nei lo va, thusawi tura ruatten Isua thawhlehna lam hawi sawiin an hmang.
Champhaiah pawh sipai pawlin zingah tawtawrawt nen kawng an zawh bakah tlaiah mual inkhawmte neiin khawlai an fang a. Aizawl Bishop Stephen Rotluanga’n Champhai Holy Cross Church, Parish hmunah Holy mass a hmanpui a, mi 68-in First Holy Communion an dawng a, mi 17-in nemnghehna sakramen an chang nghal bawk.
Heng sakramen dawng tur hian Parish chhung sub station hrang hrang atangin kohhran mite an kal.
Mamita kohhran hrang hrangte pawhin urhsun takin an hmang a. Mamit Salvation Army Corps te chuan vartianah Lal Isuan thihna hnehin thlan atanga a thawh leh thu sawiin tawtawrawt hamin khawpui an fang kual a. Kohhran hrang hrangten thingpui ruai an kilhoah hian a hmeh atan artui chhumte an hmang.