Aizawl: Aizawl West II bialtu MLA Lalruatkima chuan MNF chu Mizoram, hnam leh sakhua a him zelna tura thawktu an nih thu a sawi.
Inrinnia a bial, Dawrpui Vengthara Vanlalzawni ina mi thar lawm luhna hunah thu sawiin Lalruatkima hian MNF chu Mizo nationalism kengtu, Mizo hnam leh ram, sakhua a him zelna tura thawktu an nih thu a sawi.
Lalruatkima chuan MNF innghahna thupui chu ‘Pathian leh kan ram tan’ tih a nih tih sawiin, “A chhe thei ang bera thu dik ziktluak lo leh dawt hmangin beih kan tawk thin a. Sawiselna leh deuna karah pawh Pathian chu kan vuan a, chhe lailet dera puhna karah pawh min hruai zel a ni,” a ti.
I&PR minister hian Covid-19 leng te, lirnghing, vawk pul hri, ramri buai leh chhan hrang hrang vangin Zoramin hun harsa tak a tawk a, Pathian hruaina bakah Chief Minister Zoramthanga ruahman thiamna te, NGO leh kohhran thawhhona avangin a paltlang thei a, chhuanchham awm lovin vawiin an thleng thei chu lawmawm a tih thu a sawiin, “Tunah chuan hrite a lo ziaawm chho ta a, hmasawnna nasa leh zual he ram tan hian a thleng ngei ang,” a ti bawk.
ZPM leh Congress chungchang pawh sawiin anni hi an thawh aia thawk tha thei an awm chuang lo a. Congress chu an hre tawh a, ZPM pawh an hriat sate kha an ni nual a. Tuna an MLA leh AMC councillor-te pawh hi MNF nen danglamna tehchiam a awm lo niin a sawi.