Excise & narcotics department-in Zirtawpni zan khan Serchhip Chandmari Veng-ah heroin hawng 15 (gram 205.85), tual chhung rate-a Rs. nuai 3 chuang man nia chhut an man a. Heng ruihhlo neitua puh, Lalremmawii (40), Chanmari Serchhip leh Lalneihkimi (42), Venglai Serchhip an man tel bawk.
Ruihhlo neitua puhte hi Narcotics Drugs & Psychotropic Substance Act, 1985 hmanga thubuai siamsak niin Inrinni khan Serchhip District Court-ah hruai an ni.
Serchhipa excise & narcotics department thawktute chuan tunlaiin khawchhak lama atanga ruihhlo, heroin tawlh a hluar thar leh hle niin an sawi a. A man pawh a tlahniam hle nia sawiin, kumin March thla pawh khan heroin tawlhruk thahnem tak an man thu an sawi bawk.