UFC middleweight champion hlui Israel Adesanya chuan a champion kawnghren lakletna hun a neih a bawhpelh lo. Combat sport a a elpui hlun Alex Pereira lakah knockout chiang tak hmanga hnehna changin UFC 287-ah a champion title a la kir.
Izzy tak tak chu
Miami a Kaseya Center-ah UFC 287 hi neih a ni a. Main event-ah 185 pound huanga ngaihven hlawh rematch a thleng.
Kum 33 mi Adesanya hian round hnihnaah a khingpui hi a kut dinglam a vawi hnih hnek fuhin a hnek tlu. Pereira hian Izzy hi ‘leg kick’ hmang a bei leh thinin banga a nawr tawm laiin a fimkhur tawk loh rah a seng.
Fighter pahnihte hi combat sport-ah an inhmachhawn vawi li na a ni a, Pereira hi a hmasa pathumah a chak vek.
Kum 2016 leh 2017 khan kickboxing-ah a chak a, mixed martial arts-ah UFC 281-ah chak leh bawkin Izzy mutân ah mi tam takin an ngai.
Palian, ban sei leh a thiamna avanga tam takin 185 pound huanga ropui ber ni thei a an ngaih Izzy hian tun tumah chak ngei a tum ruh. |um dang ang lo takin a nungchang pawh a dang.
Nikum lama an intumin Izzy hian round hmasa lam thunun mahse a tawp lamah a chesual, tun tumah ‘gameplan’ fing neiin a kutthlak a nat em avanga ‘Poatan’ tia hminglem an vuah Pereira lakah rilru fim pu chungin a ding. Chetsual nei zawk a tawpah a tlawm.
24-2 MMA record nei Izzy chuan inelna zawh hnua press conference-ah, “Alex hi engpawh nise champion ropui a ni a, zaninah a champion title hloh mahse champion a ni reng. A thawnthu-ah misualpa ka ni a, zanin erawh ka thawnthu a ni ve thung. Hei hi chhinchhiah a ni reng tawh ang.” tiin a sawi.
“Gamebred a chawl ta”
Co-main event-ah welterweight fighter hlun Jorge Masvidal chu round thum chhung title contender Gilbert Burns-a’n a thunun a, unanimous decision in Burns a chak. Masvidal a tlawm hnuah a chawl.
Miami a piang leh seilian 35-17 MMA record nei Masvidal chuan, “Helai hi ka bul tanna a ni a, kum 20 chuang zet a ni tawh. Infiamna a kan tan berte an chuai hun a awm thin, cage chhung ka luhin a hma ang ka ni tawh lo.” tiin a sawi.