Manchester United in Premier League-ah a sang pali zingah tel a season khar ngei tumin an kal zel a. Everton chu hneh taka thunun in 2-0 in Inrinni tlaiah an hneh.
Old Trafford a inkhelah United an chungnung chiang. Everton tlarhnung chu hneh taka tibuai fovin first half-ah goal khungna remchang an ngah.
Huntha vawi engemaw zat an hloh a, Everton goalkeeper Jordan Pickford a lansarh viau tawh hnuah minute 36-naah Jadon Sancho ball pek luh fing atangin Scott McTominay chuan goal hmasa a khung a. Second half-ah substitute Anthony Martial chuan December thla hnua a vawikhatna atan Premier League goal a khung ve leh bawk.
United hian hnehna chiang takin chang mahse chanchin lawmawm leh lawmawm lo inkhel pakhatah an nei. A lawmawm lamah inhliam Martial-a’n goal a khung a, midfielder Christian Eriksen pawh a inkhel leh thei. An tana pawi tur erawh rinrawl ber Marcus Rashford chu inhliam vanga lakchhuah a ngai.
Coach Erik ten Hag chuan, “A hliam hi chiang zawka hre fiah turin kan nghah a ngai. Mahse beisei kan nei sang lo hle. Ka sawi tawh angin kan inkhel zing lutuk a, ni ruk chhunga match thum khelh hi a lutuk a ni.” tiin a sawi.