Premier League champion lai Manchester City in hmahruaitu Arsenal nen an inkar chu an tihniam lailawk a. Southampton khelmualah luhchilhin goal li an khung.
Inrinni zanah City hian title inchuhnaah chetsual a thiang tawh lo tih hre rengin Arsenal chungah ‘pressure’ siam an tum. An striker chhuanvawr Erling Haaland pawh inkhel leh thei tawhin an goal thun khawl hian goal hnih a khung a, 4-1 in hnehna an chang.
Haaland a lo kir e
Norwegian striker hi international break laia a inhliam avangin Liverpool an hneh tumin a inkhel thei lo tawh. Mahse Saints lakah bul tan tir niin halftime dawnah goal a khung a. Kevin de Bruyne ball siamsak chu khungin Belgian midfielder hi Premier League chanchin a midang goal khung tur vawi 100 siamsak tling thei rang ber a ni.
Tunlaia kheltha Jack Grealish bawk a che leh. Minute 58-naah an goal hnihna tha taka a khung hnuah Haaland-a bin luh turin ball a cross a, tun season a goal 44-na a khung.
Sekou Mara chuan Saints tan goal khat khung ve mahse Haaland thlaktu Julian Alvarez chuan an goal li na penalty atangin a khung.
Pep Guardiola pawlte hi inelna hrang hrangah a zawna vawi 8 an chakna a ni a. Season tawp khar that an tum a, hlawhtling tur erawhin chetsual an tan a thiang tawh lo.
Guardiola chuan a striker fakin, “Cristiano Ronaldo leh Lionel Messi te hunlaiah kan awm a, Erling pawh hian anni thlen chin hi a thleng ve thei.” a ti.